РУСКИ КЕРЕСТУР – Младежска Мултимедиялна манифестация „Дньовкаˮ, хтору орґанизує Здруженє гражданох „Пакт Рутенорум” (Pаct Ruthenorum) будзе отримана на соботу 11. новембра, а приявиц ше за участвованє ище вше мож.
Тогорочна „Дньовкаˮ, хтора ше отримує у рамикох Културней манифестациї „Костельникова єшеньˮ, почнє зоз виставу фотоґрафийох хтори сцигли по конкурсу на 19,30 годзин у просторийох Младежского дому, односно у дакедишнїм диску „Амадеусˮ.
Тогорочна тема на конкурсу за найлєпшу авторску фотоґрафию – „Дзираˮ, а члени „Пакт Рутенорумуˮ и того року под час програми виберу найлєпши авторски роботи.
На главней програми „Дньовки”, хтора почнє на 20 годзин тиж у просторийох Младежского дому, наступя млади музичаре, танєчнїки и писателє, векшина уж позната публики, а дзепоєдни и дебитанти.
По словох орґанизаторох манифестациї, їх задумка така же би тогорочна „Дньовкаˮ була спонтана зоз надосц импровизациями, як за модераторох програми так и за учашнїкох, та окреме наглашую же, кед ище вше єст заинтересованих хтори би жадали наступиц на тей манифестациї, можу то зробиц гоч и без приявйованя пред тим.