На турниру участвовали дванац екипи

автор А. Паланчанин
221 Опатрене

НОВИ САД – У просторийох Руского културного центру у Новим Саду, внєдзелю 10. децембра, у рамикох Спортских бавискох „Яша Баков” отримани турнир у пикаду.

На турниру участвовали вєдно дванац екипи – осем хлопски и штири женски екипи. У хлопскей конкуренциї домашнї мали два екипи – РКЦ 1 и РКЦ 2, потим зоз Вербасу була екипа Папивинґ, зоз Дюрдьова екипа Тарас Шевченко, зоз Руского Керестура СД Русин, зоз Коцура ФК Искра, а пришли и два екипи зоз Републики Горватскей и то зоз Петровцох и Вуковару.

У женскей конкуренциї на змаганю були екипи єдна зоз Нового Саду (РКЦ), зоз Вербасу (Папивинґ), зоз Дюрдьова (Тарас Шевченко) и зоз Руского Керестура (СД Русин). Кажда екипа мама два члени.

Стрилки ше руцало у штернац серийох, а потим отримане поєдинєчнє и мишане змаганє.

У хлопскей конкуренциї екипа Искри завжала перше место, друге СД Русин, треце Папивинґ, штварте Вуковар, пияте Петровци, шесте Тарас Шевченко, седме и осме место освоєли екипи РКЦ 1 и РКЦ 2.

У конкуренциї женских екипох найлєпша екипа була Тарас Шевченко зоз Дюрдьова, на другим месце екипа СД Русин, треца була екипа Папивинґ и штварта екипа РКЦ.

У мишаней конкуренциї перше место освоєл СД Русин, друге Тарас Шевченко, треце Папивинґ и штварте РКЦ.

У поєдинєчней конкуренциї найлєпши резултат посцигол Янко Хома (СД Русин), на другим месце Златко Колєсар (Искра) и на трецим Иван Папуґа (Папивинґ). У конкуренциї женох найлєпша була Мария Хромиш (Тарас Шевченко), на другим месце Андєла Латинович (СД Русин) и треце Ива Петкович (РКЦ).

По конєц рока буду отримани ище два турнири и то у ґуґланю и штреляцтве, а обидва у Вербаше.

ПОВЯЗАНИ ТЕКСТИ