НОВИ САД ‒ У конкатедралней Церкви св. апостолох Петра и Павла, всоботу дополадня була Служба Божа св. Йоана Златоустого. Пополадню, вечар на 20 годзин Вельке повечериє з литию (Крачунске всеночне) з нашим епархом преосвященим владиком кир Георгийом Джуджаром и парохом о. Юлияном Рацом, а потим и колядованє и друженє у Церковней сали, на хторим бул и владика.
Внєдзелю, на 10 годзин була Архиєрейска Служба Божа св. Василия Велького з мированьом, хтору предводзел кир Георгий Джуджар, сослужел парох о. Рац, дзияковал Йовґен Надь и шпивал Хор „Гармония” з дириґентку Сузану Ґрос Маркович и солистку Бранку Оклєша.
У своєй казанї, владика кир Георгий гварел же нас Бог удостоєл и того року славиц народзенє Сина Божого. То велька, таємна задумка Господа Бога, кед Бог приходзи на Жем, тот хтори створел Жем и трима цалу вселену. Приходзи врациц людске блаженство, хторе чловек страцел з першим грихом.
Бог постал єден з нас, же бизме ше могли спашиц, за живот вични, з Богом, за цо треба вира и витирвалосц на тей драги. Господь нас перши полюбел и стара ше о нас и за кажду хвильку нашого живота, поручел наш епарх кир Георгий Джуджар, и повинчовал шицким Рождество Христово.
