ВЕРБАС – Жимски фестивал „Новорочни чародїйства”, отримани на Площи Николи Пашича у Вербаше, през штири днї тирваня позберал вельке число нащивительох.
По словох орґанизаторох, манифестация обдумана насампредз за наймладших, а рижнородна програма даскельо днї виполньовала центер городу. У вечарших годзинох тот простор ше претварял до шветочней сказки дзе ше зменьовали театрални представи, концерти, наступи числених аниматорох, друженє з Дїдом Мразом, як и з велїма подобами зоз сказкох и рисованох филмох.
Фестивал „Новорочни чародїйства” провадзел и Новорочни базар. На числених столїкох углавним локални продукователє нащивительом понукали домашнї лакотки, медовнїки, пампушочки, алє и ручни роботи, новорочни и крачунски прикраски, предмети за обисце, шапки, шуфи и друге жимске облєчиво.
Орґанизатор жимского фестивалу „Новорочни чародїйства” була Туристична орґанизация општини Вербас котра ше остарала же би того року було вецей змисти и интересантносци, та зазначене вельке число наймладших, алє и старших, нащивительох у центру Вербасу.
