Наступели зоз „резервнуˮ поставу

автор А. Медєши
261 Опатрене

НОВА ҐАЙДОБРА – У 10. колу Подручней фодбалскей лиґи Зомбор, хторе одбавене всоботу 14. октобра, фодбалере Русина госцовали у Новей Ґайдобри дзе одбавели нєришено 1:1 (0:0), процив домашнєй екипи Соко, а ґол за Русин дал Матей Саянкович.

Пре оправдане одсуство вецей бавячох, Русин на тим стретнуцу наступел у кус вименєним составе, та после длугшого часу бавели дакедишнї русиновци – браца Оросово, Желько и Борис, потим Денис Гарди, як и оцец и син Саянковичово.

У першим полчасу водзело ше ровноправне бависко без ґолох.

У другей часци, такой на початку, домашнї дали ґол и почали водзиц зоз 1:0. Такой о штири минути, Сушич пребива по боку и виходзи на ґолмана, алє го нє звладал. Лабда ше одбива на другу стативу опрез хторей стої Саянкович хтори змирено уґурал лабду до празного ґолу и виєдначел на 1:1.

По конєц стретнуца було ище даскельо прави нагоди, алє посцигнути резултат остал нєришени.

За Русин бавели – Желько Орос, Филип Тома (Златко Саянкович), Боян Голик (Деян Чернок), Иґор Хрнчар, Александар Кочиш, Борис Орос (Денис Гарди), Филип Вуйович, Дарко Сушич, Небойша Попович, Стефан Мароєвич, Матей Саянкович.

На нєдзелю 22. октобра, до Керестура приходзи вше атрактивни процивнїк, екипа з Червинки.

ПОВЯЗАНИ ТЕКСТИ