Початком мешаца Скупштина РС вигласала осем од дзевец членох до Совиту Реґулаторного цела електронских медийох (РЕМ), а нє вигласани анї єден зоз двох предложених кандидатох зоз лїстини националних совитох котрих потримала Координация НС.
Без потребного числа гласох остали Мухедин Фиюлянин и Люмтуриє Амети. После нєуспишного вибору, Координация НС тераз предклада нових кандидатох Сретена Йовановича, и Иштвана Боджония чийо мено було споминане и скорей. Першобутно було одлучене же Координация предложи Боджония и Фиюляния, познєйше перши кандидат заменєни зоз Аметийом, а то виволало нєзадовольство на вецей бокох. Можлїве же праве тото то и причина же посланїки РС нє дали потримовку анї єдному кандидатови.
До РЕМ вибрани Стевица Смедеревац котрого предложели защитнїк гражданох, поверенїк за защиту ровноправносци, поверенїк за информациї од явного значеня и защити особних податкох. Милан Петкович котрого предложели акредитовани универзитети у Сербиї, Милош Ґарич котрого предложели здруженя видавательох електронских медийох. Потим вибрана Милева Малешич на предклад здруженя новинарох, Ира Проданов Країшник на предклад здруженьох филмских, сценских и драмских уметнїкох и здруженя композиторох. Вибрани и Родолюб Шабич котрого предложели здруженя котрим цилї витворйованє шлєбоди виражованя, та Дубравка Валич Неделькович на предклад здруженьох чийо цилї защита дзецох. Снежана Милькович на предклад церкви и вирских заєднїцох.
Предложени були 18 кандидати, а було потребне вибрац лєм дзевец особи, гласало ше поєдинєчно за каждого предложеного. Присутни були 158 посланїки, а каждому вибраному требало найменєй 128 гласи. Так вибрани осем кандидати, док дзевяти член нє вигласани. Праве пре таку ситуацию, штверо нєзависни кандидати, загрожели же задзекую кед же ше нє вибере ище єден член. Совит РЕМ формално формовани, алє упитни його леґитимитет и капацитет за приношенє квалификованих одлукох о медийней сцени.
Тих дньох розпочати остатнї крочаї по тим питаню, а час укаже чи то будзе розришенє вецеймешачного нєзадовольства явносци.