НОВИ САД – Збори гражданох Нового Саду, внєдзелю, 14 септембра орґанизовали протест Шлєбодо, ту зме на Площи шлєбоди.
Протест Зборох Нового Саду Шлєбодо, ту зме почал у центре города и после краткей бешеди гражданє рушели ґу Кампусу Универзитета, дзе ше ґу гражданом придружели студенти. Вони глєдали розписованє виберанкох и поручели же кампус остава шлєбодни. У Кампусу Универзитета отримане 16 минути цихосци, кратки бешеди и закончел ше зоз наступом ґрупи Новотерашнї Биґ Бенд.
Всоботу, 13. септембра на Петроварадину, у Рельковичовей улїци, бул сход прихильнїкох Сербскей напредней странки процив блокадох хтори орґанизовала нєвладова орґанизация Центер за дружтвену стабилносц.
Годзину скорей при парку у Петроварадину и коло Варадинского моста з новосадского боку зишли ше и представнїки Зборох гражданох.
Полиция у опреми за розбиванє демонстрацийох и припаднїки Жандармериї, блокирали мост на новосадским боку и Беоґрадску капуру у Петроварадину и так онєможлївели же би ше учашнїки двох сходох стретли.
