НОВИ САД – На отриманей схадзки Управного одбору Заводу за културу войводянских Руснацох прилапени звит фаховей Комисиї о росподзельованю средствох по приявох хтори сцигли на Конкурс за софинансованє програмох и проєктох очуваня, пестованя, презентациї и розвою култури и уметности рускей заєднїци у Републики Сербиї и принєшена Одлука о пременки шедзиска Заводу за културу.
У Заводзе за културу войводянских Руснацох (Матици сербскей 15) пияток, 4. юлия отримана 28. схадзка Управного одбору. На Дньовим шоре були 6 точки. Окрем прилапйованя записнїкох зоз скорейших схадзкох, розпатрени и звит и предклади ранґ лїстини фаховей Комисиї за оценьованє проєктох послатих на Конкурс.
Фахова комисия за розподзельованє приявох по Конкурсу за 2025. рок, констатовала же на Конкурс сцигли 22 прияви од вкупно 19 подношительох. Шицки прияви поднєшени благочасово и з подполну документацию.
За програми очуваня и пестованя нєматериялного културного скарбу, розподзелєна вкупна сума од милион динари: КУД „Петро Кузмяк” за проєкт „Участвованє дзецинскей шпивацкей ґрупи на руских фестивалох 2025 року” – 40.300,00 динари, Здруженє женох „Олория” – за проєкт „Набавка опреми за озвучованє приказованя културного скарбу” – 40.300,00 динари, Здруженє гражданох СОФИА за проєкт „Вибиванє и вишиванє” – 40.300,00 динари, Руски културни центер за проект „Порядна робота секцийох РКЦ у 2025. року” – 233.000,00 динари, КУД „Тарас Шевченко” за проєкт „Робота музичней и фолклорней секциї у 2025. року” – 93.200,00 динари, КПД „Карпати” за проєкт „Пририхтованя секцийох за участвованє на манифестацийох, концертох, фестивалох од окремного значеня за руску заєднїцу и других манифестацийох дзе поволане Дружтво” – 186.400,00 динари, КПД „Дюра Киш” за проєкт „Порядна робота оркестра и старшей шпивацкей секциї КПД Дюра Киш, Шид” – 93.200,00 динари, РКУД „Др Гавриїл Костельник” за проєкт „Мост медзи прешлосцу и будучносцу –очуванє идентитету, култури и скарбу” – 93.200,00 динари, КПД „Иван Котляревски” за проєкт „Пририхтованя за участвованє на манифестацийох, концертох, виставох, фестивалох. Очуванє и презентация културного скарбу” – 46.600,00 динари, Союз Руснацох Українцох Сербиї за проєкт „Медзиреґионалне сотруднїцтво з Русинами у других жемох” – 40.300,00 динари, Руске дружтво за проєкт „Шветочна академия Мацери Рускинї“ – 93.200,00 динари.
За програма сучасней уметнїцкей творчосци розподзелєна вкупна сума од 500 тисячи динари: КПД ДОК за проєкт „Представянє гумористично-сатиричного творительства Рускиньох и Руснацох“ – 20.000,00 динари, Руска матка за проєкт „Презентация сучасней рускей литературней творчосци“ – 20.000,00 динари, КУД „Тарас Шевченко” за проєкт „Робота рецитаторскей секциї у 2025. року“ – 50.000,00 динари, Здруженє гражданох „Фабрика креативносци” за проєкт „Попреплєтани“ – 50.000,00 динари, Руски културни центер за проєкт Бабкарско-драмска дзецинска представа „Мило ми, я Руснак/Рускиня” – 100.000,00 динари, КУД „Жатва” за проєкт „Два ювилеї у Коцуре” – 20.000,00 динари, МАТКА – ДРНСВ за проєкт „Театер – Сучасни спокуси” – 20.000,00 динари, Музичне здруженє руснацох „Музика Рутеника” за проєкт Знїманє музичного албума: „Одведз ме там дзе нє пада шнїг” Р&М ТИМ и приятелє“ – 100.000,00 динари, РНТ „Петро Ризнич Дядя” за проєкт „Диґитализация скарбу РНТ Петро Ризнич Дадя” – 100.000,00 динари, Здруженє гражданох „Пакт Рутенорум” за проєкт „Медзинародни волонтерски камп 2025“ – 20.000,00 динари.
За проєкт Театрална представа „Кантата за Ленку и Лазу” РНТ „Петро Ризнич Дядя” нє опредзелєни средства зоз обгрунтованьом же апликант уж ма єден проєкт на сучасну уметнїцку творчосц цо нє у складзе зоз Правилнїком о способе, критерийох и мерадлох за суфинансованє програмох и проєктох очуваня, пестованя, презентациї и розвою култури и уметносци рускей заєднїци.
Одлука о розподзельованю средствох по Конкурсу єдногласно прилапена.
Принєшена и Одлука о пременки шедзиска Заводу за културу войводянских Руснацох. Дотерашня адреса шедзиска Улїца футожска число 2/III, меня ше на нову адресу: Нови Сад, Улїца матици сербскей, число 15.
Под точку рижне Любица Отич поинформовала же при концу пририхтованє Каталоґа музейней збирки Руски Керестур. Порихтани текст и фотоґрафски материял, а очекує ше же Каталоґ будзе видруковани на єшень. Тиж и Миряна Дєкич поинформовала же Завод достал средства у суми од 505 тиячи динари по проєкту Нєрухоми материялни културни скарб за опреманє найстаршей рускей хижи од Министерства култури.
