Нєдавно сом зоз сином правела дробни колачи зоз купчих зомлєтих кексох. Нє була идея мац добри колачи, алє дружиц ше, та док зме вєдно мишели, котуляли, прескладовали, видзела сом дас пейц-шейсц дробни фалатки целофану чи найлону у кекси. Перше сом думала же то ми дацо позберали, а вец сом похопела же кекси на хторих пише „же су идеални за єдзенє и колачи” зомлєти зоз хто зна якима ище продуктами и постала сом подозрива.
Попреберали зме го, направели лабдочки, положели до швицацих паперикох, украшели зоз гвиздочками, цифрованима бомбонками и положели на єден зоз гевтих найсвяточнєйших танєрох цо ци мац подарує най маш за колачи. И єме ми, алє я ше цали час обавам чи ше дакому дацо нє случи, чи дакому нє забегнє… И поєдли зме и нє було нїч. Я ришела же од тераз сами будземе млєц свойо кекси.
О тим року роздумуєм як и о спомнутих кексоха. Наисце нам ше того року койцо увалєло до живота, за хтори зме пред концом гевтого думали же будзе щешлїви, же пандемия преходзи, лєм най зме здрави… У медзичаше зме достали войну у сушедстве, у крайох одкаль и ми сами пришли и громади людзох цо ше шпотаю по Европи глєдаюци свой мир. Пришла економска криза, инфлация, знова зме почувствовали нєдостаток продуктох. А здравє пошло на живци, бо ше и векшина медийох потрудзела же бизме знали и кажди деталь кланя мафияшох, прецо дахто дакого забил у фамелийним насилстве, политика, виберанки, политика, виберанки, а вец уруцели и пантера…
На вельо того нє можеме уплївовац и вельо раз нє можеме знац правду, алє голєм можеме одредзиц же цо жадаме же би було на нашим каждодньовим мению.
Сцем повесц, кед сце у можлївосци, у Новим року сами мельце свойо кекси. Нє дошлєбодзце же би вам ше „предавало” гоч цо, попреберайце тото цо вам ше сервира. А кед дакеди мушице прелїґнуц и дацо подозриве, плювнїце набок тот найлон, и идземе далєй. Кед дакус украшиш зоз гвиздочками, положиш швицаци паперик, цифровани бомбонки и сервираш на найсвяточнєйши танєр – голєм є красше, кед нє вельо лєпше. Понеже приставам ґу тези же ядловец з ґомбулями и лампочками найкрасши кич на швеце, любим кед ми шицко швицаце, та гоч є исте, голєм є веселше. А Крачун и Нови рок праве час кед важне роздумовац о позитивних, красних стварох, обрациц ше на бок хтори нас духовно карми. Наздавам ше же сце у своїх обисцох, зоз своїма наймилшима, же вам весело и же сце здрави и у мире зоз собу и най би так остало, алє меркуйце цо лїґаце!
На многая и благая лїта!