РУСКИ КЕРЕСТУР – Рочна скупштина Конїцкого клуба „Русин” отримана всоботу, 4. фебруара у Руским Керестуре у просторийох Добродзечного огньогасного дружтва. На Рочней скупштини представени Звит о роботи за 2022. рок, План роботи за тот рок и Финансийни звит за прешли рок.
На початку скупштини предсидатель Kлубу Желько Папуґа поздравел и привитал шицких присутних и поднєсол Звит о роботи за 2022. рок. Вон пояшнєл же отримани конїцки обеговацки дзень, на котрим було седем точки зоз участвованьом парадних запрагох. Ище гварел же було досц почежкосци, алє до конца шицко було успишно одробене. Сцигол и авто-старт котри пуща конї за обегованє, котри купени од Конїцкого клубу „Войводянин”, потим поробена єдна часц защитней огради за цо достати средства од Општини Кула, а тиж и посадзени древка на єдней часци гиподрома споза судийскей трибини.
Плани Конїцкого клубу за 2023. рок же би ше отрималo обеговацки дзень, першого тижня у юлию, кед же будзе виводлїве. Планує ше седем обегованя и участвованє парадних запрагох. Планує ше и предлужиц з роботами на защитней огради, потим и вибудов тоалету на гиподроме. Приоритет будзе насипованє дражки, средства уж обезпечени, лєм треба ришиц ґранулацию и кельо треба кубики на тоту дражку же би ше насипало адекватну твардейшу подлогу.
Цо ше дотика финансийного звиту за прешли рок, клуб дїловал позитивно. Прешлого року Клуб од oпштини достал 300.000 динари. Средства достати по двох розличних конкурсох и потрошени су наменски, по проєктох, з чого виплацени и награди на обегованю.
На Скупштини присуствовали предсидатель Совиту МЗ Руски Керестур Владимир Олеяр, госци зоз Зомбора зоз конїцкого клубу „Войводянин” зоз предсидательом и членом предсидательства Союзу Сербиї Браниславом Йокичом, потим член змагательней комисиї Никола Прерадович, госци зоз Деспотова зоз Конїцкого клуба „Деспотово” зоз предсидательом Бором Попина, дежурни ветеринаре Михайло Семан и Йово Хайдин, члени Конїцкого клубу „Русин”, як и члени ДОД котри уступели просториї.
