РУСКИ КЕРЕСТУР – Здруженє спортских рибарох „Коляк”, отримало порядну Рочну скупштину у Майсторским доме. На дньовим шоре винєшени звит о роботи у 2025. року, потим финансийни звит зоз 2025. року и план роботи за 2026. рок.
Предсидатель Здруженя Мирко Фекете на Скупштини внєдзелю, 8. фебруара, привитал присутних на Скупштини и поднєсол звити и плани за 2026. рок. Од активносцох, през рок отримани седем схадзки на хторих ше одлучовало о роботи Здруженя, потим отримани шейсц роботни акциї, а рибаре були уключени до шицких активносцох у валалу. У фебруару направени ґарадичи на писти, у юлию була акция ушорйованя базену, потим у октобру була роботна акция кед ше ушорело места на писти за змаганє. Рибаре у авґусту оправяли лавочки на базену, а у септембру ушорйовали писту за змаганє Чукияда „Йожеф Киш”. Члени СЗР „Коляк” ушорйовали беґель, чисцели и винїмали шицко цо заґадзовало воду.
Отримани вецей змаганя и спортски активносци, а члени Здруженя видвоєли Спортске змаганє у лапаню риби на дуґов хторе було отримане у септембру 2025. року за членох ЗСР „Коляк” на новей писти. У септембру тиж отримане змаганє у вареню рибового паприґашу. Орґанизована и Чукияда „Йожеф Киш”, а тиж и традицийне Коляково змаганє, 18. чукияда, з нагоди Дня ошлєбодзеня валалу од фашизму хтора була у октобру. Члени ЗСР „Коляк” орґанизовали и змаганє на фидер на рибалову Еделински, дзе ше вше одволує вельо змагательох.
Кед слово о финансийним звиту за 2025. рок, Коляк дїловал позитивно, вкупни приходи Здруженя виношели 156.900 динари, а розходи були 121.500 динари.
Керестурски рибаре чишля 99 членох, з хторих 29 сениоре, 60 пензионере и 10 повласцени. У Здруженю тераз єст и 25 пионирох, а як наглашели число пионирох ше звекшує.
Цо ше дотика планох за 2026. рок, ЗСР „Коляк” планує отримац клубски змаганя, планує ше одход до Миклошевцох, тиж ше планує орґанизовац Малу школу за рибарох и еколоґийну едукацию пионирох. Рибарске Здруженє и того року будзе главни орґанизатор у змаганю вареня рибового паприґашу „Керестурски рибарски вечар”, потим участвованє у шицких волонтерских акцийох, як и предлужиц сотруднїцтво зоз шицкима здруженями. Планує ше и ошвициц рибарску писту и посипац шут.
Того року позберани и материял за Рибарску моноґрафию.
Предсидатель Мирко Фекете вихасновал нагоду же би визначел добре сотруднїцтво зоз локалну самоуправу Општини Кула, Месну заєднїцу Руски Керестур, ЯКП „Руском”, локалнима подприємствами „Комфорт”, „Тина ентериєри”, „Електромонтажа”, Предавальня „Фреш маркет”, Рибарска опрема „Тадич”, Рибалов „Русин”, Рибалов „Еделински”, як и зоз другима здруженями зоз валалу – Конїцки клуб „Русин”, Здуженє паприґарох „Капсикум анум” и Добродзечним огньогасним дужтвом.
На схадзки рибарох присуствовали и представителє других здруженьох, члени УО, и числене членство котре чишлєло коло 60 присутних.