НОВЕ ОРАХОВО – На дзень кед народзена Сенка Беник, внєдзелю 28. децембра при фамелийнией хижи Папуґових, дзе жила покойна професорка Сенка Бенчик, отримане здогадованє на тоту нашу професорку.
Того року у януару, на Националне швето Руснацох одкрита спомин-плоча, а виробок тей плочи финансовало КУД „Петро Кузмяк” зоз Нового Орахова зоз средствох Општини Бачка Тополя, а виробел ю каменьорезач Владимир Малацко и Славко Мецек.
Внєдзелю, 28. децембра ше опрез фамелийней хижи зишли члени фамелиї, почитователє роботи тей нашей професорки хтора зоз свою роботу допринєсла же би ше чувало и унапредзовало руски язик.
Здогадованє зоз програму орґанизовали Сeнково шестри Таня и Снежана, а у програми участвовала Миряна Бицок и Срдян Ґовля. Сенка Бенчик, дзивоцке Папуґа, народзена 28. децембра 1973. року у Бачкей Тополї. Преподавала руски язик як виборни предмет зоз елементами националней култури, у Основней школи „Чаки Лайош” у Бачкей Тополї и „18. октобер“ у Новим Орахове, дзе єден час окончовала и длужносц директора. Ушорйовала и водзела радио-емисию на руским язику на Радио реґиї и на локалней бачкотопольскей телевизиї, була и дописователька рускей редакциї Радио Нового Саду. Активно участвовала у роботи КУД „Петро Кузмяк” у Новим Орахове. Маст. Сенка Бенчик виглєдовала гунґаризми у руским язику и на Филозофским факултета у Новим Садзе одбранєла два мастер роботи: Гунґаризми у руским язику и Заєднїцки гунґаризми у сербским и руским язику. Авторка є двох кнїжкох „Гунґаризми у руским язику” (2014) и „Лексични паралелизми“ (2020) хтори видало Дружтво за руски язик, литературу и културу. Сенка Бенчик умарла 18. юния 2021. року после краткей, алє чежкей хороти. Похована є на теметове у Бачкей Тополї.
