НОВИ САД – Покраїнски секретарият за образованє, предписаня, управу и национални меншини – национални заєднїци 14. септембра розписал пейц нови конкурси, два з обласци образованя и три з обласци витворйованя правох националних меншинох – националних заєднїцох. Прейґ тих конкурсох, вкупно ше додзелює 31,2 милиони динари.
Конкурси ше одноша на трошки обуки талантованих школярох основних и штреднїх школох з териториї АП Войводини и анґажованя фахових сотруднїкох на Андревлю за 2022. рок, потим за финансованє и софинансованє виробку технїчней документациї за потреби установох основного и штреднього образованя и воспитаня, як и за програми и проєкти националних совитох националних меншинох у обласци основного и штреднього образованя – дотиранє пририхтованя и виробку тестох и задаткох на меншинских язикох.
Други два конкурси з обласци витворйованя правох националних меншинох – националних заєднїцох то Конкурс за виробок писаней роботи на тему „Мой славни сограждан” и Конкурс за вибор видео роботу на тему „Вияшнї ше”.
Рок за подношенє прияви за перши три конкурси 28. септембер, а за конкурси за вибор писаней и видео роботи 30. септембер того року.
Формулар упитнїка з прилогами и други информациї мож найсц на сайту спомнутого секретарията www.puma.vojvodina.gov.rs