НОВИ САД – Зоз Архиєрейску Службу Божу и своїм владиком, епархом кир Георгийом Джуджаром, велїма паноцами, монахинями и госцами, Новосадянє преславели Кирбай, швето святих верховних апостолох Петра и Павла
У конкатедралней Церкви святих апостолох Петра и Павла у Новим Садзе, 12. юлия, кирбайску Архиєрейску Службу Божу предводзел владика кир Георгий Джуджар, а зоз шпиваньом ю украшел и Хор „Гармония” зоз хторим дириґовала Сузана Ґрос Маркович, солистка була Бранка Оклєша, а на богослуженю дзияковал Йовґен Надь.
У своєй казанї владика кир Георгий гварел же кажда епоха у историї ма своїх велїканох хторих народ люби, лєбо нє люби, алє права слава каждого з нас будзе така яка є у очох Божих. Видзиме же святи Петро и Павло и нєшка творя историю. Апостоли перше були обични людзе, Петро рибар, а фаризей Савле, познєйше Павле на початку прешлїдовал християнох. Исус поволал рибарох, же буду рибаре людзох. Вони пошли, одволали ше и нє питали кельо ше им заплаци. Аж познєйше баржей похопели и полюбели Христа, и дали живот за ньго. Петро мал и слабосци. Кед було чежко, одрекнул ше од Исуса, алє вец заплакал и покаял ше. То нам приклад же ше треба щиро покаяц и милосердни Бог, хтори видзи шерца людски, пребачи. Святи Павло од прешлїдовача християнох постал мисионер. Бог го перше ошлєпнул, алє му и дал вид и духовне патренє. Апостоли дали свой живот за Церкву, хтору, як Исус гварел, анї дзвери пекельни нє надвладаю, поручел владика Джуджар. Вон додал же апостоли змирено служели Богу, нє з войском и оружийом и од нїх можеме вельо научиц. Важне буц витирвали и вирни у своєй мисиї котру нам Бог дал и котру ма кажде.
З владиком кир Георгийом служели о. Владислав Рац, єромонах Роман Кандрач, о. Михаил Холошняй, о. Дарко Рац, о. Алексий Гудак, о. Владимир Еделински Миколка, о. Платон Салак, ЧСВВ, и римокатолїцки священїк Небойша Стипич.
На богослуженю були и о. Алойзиє, о. Мирослав Жирош з України, представнїк Управи за сотруднїцтво зоз Церквами и вирскима заєднїцами у Беоґрадзе Ґаврило Ґрбан, директор Заводу за защиту памятнїкох култури Городу Нового Саду мр Синиша Йокич и Анита Ґовля, хтора помага у проєктох.
На концу, домашнї парох новосадски о. Юлиян Рац шицких привитал и подзековал на заєднїцтве у преслави Кирбая.
У живоце єст значни днї, а у народзе ше гвари же дал нам Бог дочекац дзень. Так и ми преславели наш Кирбай, швето верховних апостолох Петра и Павла, гварел о. Юлиян.
