КОЦУР – Остатня провадзаца програма першого дня традицийней културней манифестациї „Коцурска жатва”, представа „Лала”, отримана пияток вечар у дворе Етно клубу „Одняте од забуца” у Коцуре.
Марина Тодич привитала нащивительох, а як визначела, задовольна є же присутне и вельке число младшей публики на представи.
Представа „Лала” монодрама котру бавел Стефан Остоїч, тиж бул и главни продуцент, режию подписал Ли Делонґ, и була нєсподзиванє коцурскей публики.
Остоїч представел нє класични театер, алє на цикави, интересантни и нєзвичайни способ нашмеял присутних.
Представа „Лала” монодрама о любови спрам родного краю, инспирована з традицию и историю народу сивернобанатского округу. През музику, архаїчни инструменти, циркузки схопносци, фолклор, нєвербални театер, бабкарску и кловновску анимацию, главна подоба у представи представя леґенду о познатому пару, Лали и Соси.
Ґлумец през представу комуниковал зоз публику, а присутни ше дзечнє уключовали и на концу младого ґлумца наградзели зоз громким аплаузом.
Общи упечаток на концу вечара бул же шицки наисце уживали у представи и же успишно закончени перши дзень традицийней културней манифестациї „Коцурска жатва”.
