Русина дзелї лєм єден бод од першопласованого

автор а. медєши
311 Опатрене

РУСКИ КЕРЕСТУР – Дзешате коло Подручней фодбалскей лиґи Зомбор одбавене внєдзелю 16. октобра на домашнїм терену, а закончело ше зоз минималну побиду фодбалерох Русина над госцами зоз Силбашу, з резултатом 3:2 (1:0). Ґоли дали – Малацко, Саянкович, Кулич.

У першей половки стретнуца спаднул лєм єден ґол, кед при концу першого полчасу Малацко, зоз шлєбодного бица, трафя мрежу госцуюцей екипи. За розлику од першого полчасу, у другей часци посцигнути аж штири ґоли. У 55. минути Саянкович дуплирал резултат у своїм стилу кед вошол до 16 метерох и зоз прецизним бицом матирал госцуюцого ґолмана. Потим госци у нєполних 10 минутох зазначую два ґоли и виєдначую на 2:2, а же би нє пришло до нєсподзиваня у хторим госци пребераю водство, постарал ше центерфор Русина Янко Кулич, кед зоз „ножнїчкамиˮ звекшує резултат на 3:2. Бул то нєкаждодньови ґол хтори одушевел як бавячох так и вельочислену домашню публику.

Русин бавел у составе – Деян Кронич, Стефан Тома, Боян Голик, Владан Вуйович, Деян Чернок, Филип Вуйович, Янко Кулич, Оґнєн Маркович, Матей Саянкович, Андрей Малацко, Боян Бранкович.

Зоз тоту побиду Русин и далєй на 2. месце на таблїчки, и хвильково заостава єден бод за першопласованим Гайдуком зоз Стапару.

У 11. колу фодбалере Русина госцую у Обровцу, дзе ше стретню зоз домашнїм Борцом 46.

ПОВЯЗАНИ ТЕКСТИ