После новорочней и шветочней еуфориї помали можеме сумирац упечатки, подцагнуц смужку, як прешол предходни 2025. рок. У рускей заєднїци то бул рок значних ювилейох иснованя наших установох и институцийох, а зоз тим озбильно потвердзене же на тих просторох охабяме тирваци шлїди.
У малих заєднїцох, як цо то руска у Сербиї, час нє мераме лєм зоз календаром, алє, можебуц, и баржей зоз тим цо ше нам удало здобуц и зачувац. Означованє векших и менших ювилейох то нє лєм здогадованє на датуми, алє и потвердзенє же наша заєднїца ма капацитет препознац прави вредносци своєй творчосци. Таки хвильки нам лєм надпомнуце же ше идентитет нє отрима сам од себе, алє же на нїм мушиме нєпреривно робиц – у култури, образованю, информованю и явним слову.
Кед патриме ширше, на державним уровню рок означели студентски протести и реакциї власци на нїх. Мож повесц же студенти у блокади виражую свойо нєзадовольство и подозривносц на корупцию у державних институцийох одкеди спадла стреха на швижо реконструованей Гайзибанскей станїци у Новим Садзе, дзе траґично настрадали 16 особи 1. новембра 2024. року, а потераз ище нїхто нє одвитовал пред судом. Студентски револт тирва мешацами, а исто тельо тирва и реакция власци на таки збуваня. Владаюци твердза же корупциї нє було и же шицко будзе випитане. Вони тиж мали прихильнїкох медзи студентами з другого боку, на початку марца формовали камп у центру Беоґрада котри ше розширел и зопар транспорт мешацами опрез Скупштини Сербиї, такв. „Чациленд”, а котри з векшого склонєни лєм пред даскельома днями.
Источашнє, прешлого року руска заєднїца була озбильно потрешена пре пременки и числени задзекованя у Националним совиту рускей националней меншини, нєурядово, алє очиглядно же ше шицко збуло як пошлїдок политичней нєстабилносци у держави. Зоз того мож заключиц же национална свидомосц нє шме буц лєм формалносц, алє обовязно живе одношенє медзи вибранима представнїками и людзми котри их виберали.
Кед направиме огляднуце на вирски живот, прешли рок у християнским швеце бул у знаку полного одпусту, паломнїцтвох. Єден з препознатлївих знакох Ювилейного рока то отверанє Святих дзверох. Ключни елемент Святого рока були паломнїцтва, та нашо вирни були у Словацкей, Риме, Крижевцох и на других одпустових местох.
Рок починаме зоз преславйованьом Националного швета Руснацох, а централна преслава будзе на соботу, 17. януара, у Новим Орахове. Руска заєднїца у Орахове мала, алє свидома. У тим року Ораховчанє означа и 80 роки од преселєня до того валалу.