БАЧИНЦИ – У орґанизациї КПД „Драґутин Драґен Колєсар“ и Подручней канцелариї Националного совиту Руснацох вчера у школи з пригодну програму означене националне швето Руснацох.
Старша шпивацка ґрупа КПД „Дюра Киш“, у хторей и члени з Бачинцох, а у провадзеню оркестра, одшпивала державну гимну „Боже правде“ и шветочну шпиванку Руснацох „Браца Русини“, а потим и три руски народни шпиванки.
Парох о. Драко Рац гварел же мушиме чувац и почитовац свою скарбнїцу: руски язик, виру и културу же би нас вец и други почитовали и винчовал швето.
Професор историї Александар Радин з Бачинцох бешедовал о присельованю Руснацох на тоти простори и живот през историйни хвильки по нєшка.
Школяре хтори ходза на годзини руского язика з елементами националней култури, хтори порихтала наставнїца Наташа Еделински Миколка одшпивали коляди „Ноц над Вифлеєм“ и „Пречистая Дїва“.
Програму окрем домашнього пароха о. Дарка Раца, провадзели и парох з Беркасова о. Владимир Еделински Миколка, членїци Националного совиту Руснацох Нада Хромиш Аничич и Наташа Еделински Миколка и други.
После урядовей програми отримани коктел и друженє з руску музику и танцами.
