КУЛА – У грекокатолїцкей парохиї св. Йосафата вирни на Вельки пияток на 15 годзин участвовали у богослуженьох Вечурнї зоз викладаньом плащанїци до Христового гробу, а на 18 годзин домашнї парох єромонах Дамян Кича ЧСВВ и єромонах Платон Салак ЧСВВ служели Єрусалимску утриню.
Внєдзелю почало преславйованє Воскресеня Господа Исуса Христа, и з тей нагоди на 5 годзин парох єромонах Дамян ЧСВВ служел Пасхалну утриню зоз святу Литурґию и пошвецел вельке число паскалних кошаркох, а так исто и на 10 годзин єромонах Платон ЧСВВ, док у Крущичу пасхална Литурґия и пошвецанє кошаркох було на 12 годзин. На шицких Службох Божих пречитана вельконоцна винчованака нашого владики кир Георгия.
Вчера на шветли пондзелок, а други дзень Велькей ноци у кулским храму на 9 годзин була Литурґия, а потим по традициї вельконоцни концерт у церкви отримало кулске українске КУД „Иван Сенюк”.
