СУБОТИЦА – У Дружтве Руснацох у Суботици, стреду 17. януара отримана преслава Дня Руснацох на хторей присутних привитала предсидателька Дружтва Анамария Лендєр.
Лендєрова визначела же тот дзень и здогадованє на 1751. рок Руснацом барз важни. Вона здогадла на початки орґанизованого животу на просторох на хторих ми тераз жиєме зоз своїма обичаями, хтори нам нашо предки принєсли.
На преслави бул и подпредсидатель дружтва Кристиян Сопка, члени новоформованей жридловей ґрупи и члени Дружтва зоз госцами, почитователями нашей заєднїци, як членїца Националного совиту Руснацох.
На початку одшпивана руска шветочна шиванка и даскельо руски писнї, а вец предлужене друженє.
