КОЦУР – И того року родичи можу на порталу еУправа електронски заказац термин за упис и тестиранє дзецка до основней школи з порушованьом услуги еЗаказованє. Родичом котри свойо дзецко жадаю уписац до першей класи Основней школи „Братство єдинство” у Коцуре тиж тота апликация доступна од 20. марца, а термини за тестиранє розполагаюци од 1. априла по 31. май.
Же би родичи могли заказац свой термин, потребне же би були реґистровани хаснователє, односно же би мали креировани налог на порталу еУправа euprava.gov.rs, односно на державним порталу за електронску идентификацию eID.gov.rs. Потим ше поруша услугу на порталу еУправа и закаже термин у школи.
При упису нє потребне прикладац нїяки документи, винїмок лєм дохторске уверенє кед препатрунок окончени у приватного дохтора.
Министерство просвити, науки и технолоґийного розвою обезпечело потримовку родичом у вязи зоз еЗаказованьом термина за упис и тестиранє дзецка у основней школи, а одвити на шицки питаня и нєясносци можу достац на телефон 011/ 735 0557.
Тиж, шицки информациї вязани за упис першокласнїкох родичи можу достац и у Основней школи у Коцуре, лєбо на телефон 021/ 727 905 каждого роботного дня.