РУСКИ КЕРЕСТУР – Дня, 23. октобра, у своїм 83. року живота и 65. року монашества, упокоєла ше ш. Кекилия (Цецилия) Суботнїцки, СНДМ.
Наталия Суботнїцки ше народзела 15. авґуста 1940. року у валалє Селиште, општина Србац у Босни, од оца Алекси и мацери Софиї. Вихована є у вельочисленей фамелиї своїх родичох, вєдно зоз двома братами и трома шестрами, од котрих Ана-Ксения тиж ступела до чину СНДМ. Од малючка любела ходзиц до церкви, а у своїм 15 року уж робела у Епархиї у Крижевцох.
Як кандидатка приступела до згромадзеня шестрох Служебнїцох праве у Руским Керестуре, 1. априла 1958. року, а перши обити дала 1960. року.
Свойо рижнородне служенє предлужела на велїх местох. На даскельо заводи була у Италиї у Риме, у Францускей, у України, у Заґребу. Служела у манастирох шестрох Служебнїцох у Сербиї у вецей местох: у Руским Керестуре, Кули, Коцуре, Бикич Долу, Новим Орахове, Сримскей Митровици, Беркасове, Шиду и закончела писац свою кнїжку живота у манастире у СНДМ у Кули. Дзе ґод служела, вшадзи охабела свой шлїд, вшадзи дакого дотхла зоз свою любову.
Як медицинска шестра служела у шпиталю у Заґребу, у Доме здравя у Руским Керестуре, у Кули, Крущичу, Сивцу и Липару. До пензиї пошла 1995. року.
Роками робела зоз дзецми, поучовала их катехизму, пририхтовала за першу причасц, за наступи у храмох на вельки швета. У парохиї св. Йосафата у Кули зоз своїм прекрасним гласом шпивала место дзияка, була анґажована у духовним живоце кулскей парохиї, зоз женами пораєла церкву, була одивчательна шестра кулского манастира СНДМ. Свой ювилей, 65-рочнїцу Богу пошвеценого живота шестра Кекилия означела, на жаль, у шпиталю дзе ше єй благородне шерцо нєсподзивано застановело 25. октобра после краткей хороти.
Покойна шестра Кекилия цали свой живот верела до воскреснутого Исуса Христа, котрому пошвецела цали свой живот у згромадзеню Шестрох Служебнїцох Непорочней Дїви Мариї. Служела тим за котрих Исус дал свой живот и сотрудзовала зоз Господом Богом у дїлу одкупеня, визначел кир Георгий Джуджар.
На єй остатню драгу пришли ю випровадзиц кир Герогий Джуджар, о. Владислав Рац, о. Михайло Режак, о. Владислав Варґа, о. Юлиян Рац, о. Алексий Гудак, єромонах о. Платон Салак, ЧСВВ, о. Михайло Шанта и о. Ярослав Варґа, шестри Служебнїци, вирни зоз котрима ше стретала и котри ю окреме почитовали.
Хованє отримане 25. октобра, на 14 годзин на теметове у Руским Керестуре.
Вична єй памят!