РУСКИ КЕРЕСТУР – У рамикох 56. Драмского мемориялу Петра Ризнича Дядї, вчера 17. априла виведзена и перша дзецинска представа „Побиднїки”, Дому култури Руски Керестур, Драмского студия Арт, дзецинска ґрупа, автора Сашу Палєнкаша, а у режиї Адриaни Надь Барна.
Тема представи сучасна, зависносц од мобилного телефона и интернету хтора залапела шицких та и наймладши ґенерациї, и як ю победзиц.
У вельочисленим ансамблу хтори першираз наступел на сцени, штири главни улоги успишно бавели Кристина Гарвильчак, Тияна Малацко, Заря Ковач и Олеґ Катона, а як єства наступели седемнац школяре – Адела Мецек, Маша Ерделї, Кира Пап, Лина Папуґа, Йована Кушич, Михаела Малацко, Мануела Береґ, Деяна Тот, Матеа Бучко, Милица Джакула, Лара Рац, Стефани Рац, Надя Станкович, Стефан Такач, Марко Еделински, Елена Варґа, и София Сопка.
Асистентка на представи була Мая Зазуляк Гарди, суфлерка Аня Арва, майстор шветла Алексей Надь, майстор звука Сашо Палєнкаш, костимоґрафки Адриана Надь Барна и Таня Орос, сценоґрафия Адриана Надь Барна, Сашо Палєнкаш и Желько Пашо, а шминкерка и фризерка Андрея Штефанко.
У полней сали наймладшей публики були и 80 школяре зоз шицких наших местох дзе ше руски язик учи у порядней настави лєбо як виборни предмет. Їх приход орґанизовал и финансовал Национални совит Руснацох спред Одбору за образованє.
