КОЦУР – У коцурскей Грекокатолїцкей церкви Успения Пресвятей Богородици внєдзелю, 20. априла, вирни преславели вельке християнске швето, Вельку ноц.
У Страсним тижню парохиянє означели и Вельки штварток, з Вечурню и Службу Божу святого Василия Велького. На Вельки пияток бул строги пост, а того дня рано отримана и Утриня зоз читаньом 12 Страсних eвангелийох. Пополадню служена Вечурня зоз покладаньом плащанїци, хованє Исусово, а вечар отримана Дзевятнїца до Божого милосердия, як и Єрусалимска утриня, плач Мацери Божей.
У коцурскей парохиї на Вельку соботу бул дзень цихей молитви, того дня церква була отворена цали час. Парохиянє, од ранших по вечарши годзини, могли нащивиц Исусов гроб и помодлїц ше. Того вечара було Вельконоцне всеночне, Служба Божа и Воскресна утриня, зоз обходом коло церкви.
Перши дзень Велькей ноци, Воскресенє Исуса Христа, почал зоз Дзецинску Службу Божу на 8 годзин, а потим на 10 годзин отримана Велька святочна Служба Божа зоз пошвецаньом паскох. Службу служел декан бачки и парох коцурски о. Владислав Рац. Хвиля була красна и слунечна та пошвецанє вельконоцних кошаркох було, традицийно, отримане у церковней порти у котрей з тей нагоди було вельо парохиянох.
На Шветли пондзелок у шицких богослуженьох було мированє вирних, а нєшка, на Шветли вовторок, на 10 годзин будзе архиєрейска Служба Божа, зоз нашим владиком кир Георгийом Джуджаром и новопошвеценим дияконом Иваном Дацешином.
