НОВИ САД – Тих дньох вишла остатня тогорочна Заградка, а вєдно з ню и Забавна вифарбйованка зоз жимскима мотивами.
У новей Заградки єст надосц вистки о новемберских активносцох школярох у рубрикох Госци и новосци и Сцеме знац и дознац, а у Читальнї и младши и старши школяре можу пречитац писньочки наших авторох.
Мала Заградка почина зоз приповедку у сличкох, ту и жимски квизчок, як и Мала вистава.
Свойо писмени состави и малюнки послали нам школяре зоз вецей наших местох, а мож их пречитац у рубрики Школяре авторе.
На бокох Радио у Заградки, водительки Емисиї за дзеци Леа и Анамария Ранкович писали о ремеслу колєсара, а рубрика Питаня и толкованя понука даскельо интересантни факти о Драмским мемориялу Петра Ризнича Дядї хтори тиж отримани у новембру.
Нє забули зме анї на Солмизацию и облюбени Забавни боки, як и на рубрику Мудро и безпечно.