РУСКИ КЕРЕСТУР – У рамикох 56. Драмского мемориялу Петра Ризнича Дядї, вчера 18. априла виведзена друга представа за дзеци „Заспана красавица”, по тексту Любивоя Ршумовича, у режиї Слободана Ноґавици.
Добре позната класична сказка о прекрасней Ружици на хтору зла вила руцела клятву же би спала сто роки, а хтору на концу зоз поцилунком будзи принц, поручує же любов шицко победзує.
Представа написана як комедия, а виведли ю ґлумци Дзецинскей драмскей секциї Културного центру Кула хтори ше зоз ню, после наступу пондзелок, на Општинскей смотри дзецинскей театралней творчосци у Крущичу, пласовали и на Зонску смотру.
Представа будзе вивдзена и у Кули на нєдзелю 21. априла на 19 годзин.
