Виведзена представa за дзеци „Бал”

автор Ол. Живкович
439 Опатрене

РУСКИ КЕРЕЕСТУР – Всоботу, 28. януара на бини Дома култури Руски Керестур, виведзена представа за дзеци „Бал”.

Представа за дзеци „Бал”, премиєрно виведзена 7. децембра на Драмским мемориялу Петра Ризнича Дядї.

Представу бавели млади ґлумици Мая Надь, котра бавела принцезу, Яна Варґа бавела єй мацер кралїцу, Ксения Катрина була ангел, а Валентина Гарди бавела дябла. Представу як автор подписує Сашо Палєнкаш, а режию Адриана Надь Барна.

Цала екипа котра сотрудзовала на роботи тей представи у нєзависней продукциї добре зна свою роботу, та и представа удатна. З оглядом же младим ґлумцом то друге виводзенє, добре ше знаходзели на сцени, успишно преточели авторову приповедку на бину, под сиґурну руку режисерки котрей то перши проєкт такей файти. Од ґлумицох ше видвоєла Яна Варґа, котрей то нє перша представа, и котра сиґурно владала зоз сцену.

Правда, требац будзе ище вигладкац дзепоєдни нєдоповедзени дробнїци, алє нє треба сумняц же ше младей екипи тото и уда. У публики були, углавним родичи зоз меншима дзецми и очиглядно уживали у представи, на цо указали праве наймладши патраче котри провадзели представу нє дихаюци.

ПОВЯЗАНИ ТЕКСТИ