РУСКИ КЕРЕСТУР – У гуманитарней акиция за помоц Сеґедийовим з Руского Керестура, хторим 8. новембра погорело обисце, Керестурци назберали коло 107.000 динари, а од вчера порушана нова гуманитарна акция за помоц Уни Вуканац зоз Червинки.
Здогаднїме, Уна народзена як здрава беба, алє єй даскельо мешаци познєйше дияґностификована спинална мускулова атрофия тип 1, и од теди почина борба за єй живот.
За малу Уну, у Керестуре першираз порушана гуманитарна акция 2020. року кед назберане 38.000 динари, медзитим, акция ознова порушана, понеже дзивчецу и далєй нєобходни средства за купованє медикаментох, медицинского потрошного материялу, за физикални терапиї, регабилитациї у баньох, специялистични препатрунки и лабораторийни анализи.
Малей Уни мож помогнуц на уж познатих локацийох, як цо – предавальня „Тренд биˮ, кафич „Мала оазаˮ, ЯКП „Рускомˮ, предавальня „Виславски делови Мˮ, „Транспортни центер Ковачˮ дзе поставени шкатули за добродзечни прилог.
Окрем шкатулох на спомнутих локацийох, за Уну Вуканац отворени и жиро-рахунки на котри мож доновац пенєж:
динарски: 160-6000001528240-34
девизни: 160-6000001535474-60
IBAN: RS35160600000153547460
SWIFT/BIC: DBDBRSBG
А пенєж мож уплациц и прейґ СМС порученя у хторим треба написац 87 и послац на число 3800 (цена порученя 200 динари).