КОЦУР – По пошвецаню води на швето Богоявлениє почало и пошвецанє обисцох вирних грекокатолїцкей парохиї у Коцуре. Пошвецанє тирвало покля паноцове нє обишли цали валал, односно по перши дзень фебруара.
Обисца вирних у Коцуре пошвецали парох коцурски о. Владислав Рац и парох нововербаски о. Данил Задрепко. З богоявленску швецену воду паноцове преноша Божи благослов на животни простор, на фамелийни дом и на самих його членох.
Пошвецанє ше одвивало по одредзеним розпорядку котри бул виложени на огласних таблох коло церкви, як и на вецей местох по валалє.
Пошвецанє почало од просторийох парохиялного Каритасу „Марийов дом” дзе о. Раца дочекали волонтере Каритасу, на чолє зоз його координатором Янком Салонтайом.
Парох коцурски о. Владислав Рац пошвецал часц валала од Савиного Села, а парох нововербаски о. Данил Задрепко пошвецал часц валала од Вербасу.