НОВИ САД – Традицийни 23. Руски фестивал малих сценских формох – Дюра Папгаргаї, закончени всоботу, 6. децембра у просторийох Словацкого културного центру Павел Йозеф Шафарик, з виводзеньом наградзованей представи Ковалє, Милоша Николича, на тот завод у продукциї драмского ансамблу Словацкого театру Владимир Гурбан Владимиров зоз Старей Пазови.
Углядни словацки аматерски театер хтори у Старей Пазов сновани 1903. року, Ковальох поставел у завлоньскей сезони, а на Руским фестивалу малих сценских формох – Дюра Папгаргаї було 28. виводзенє тей представи. Гоч од єй предостатнього виводзеня прешол скоро цали рок, треба визначиц же ше на сцени тота павза нє обачела, а убавени ансамбл ю у високим ритме одбавел од першей по остатню сцену. У познатей комедиї Милоша Николича хтору режирал Александер Бако бавя Янко Шаркези, Иґор Пискла, Зденко Кожик, Марина Бакова и Александер Бако у епизодней улоги.
После представи, члени старопазовского ансамблу участвовали на округлим столє з тему Театер – сучасни спокуси хтори модеровал предсидательМатки– Дружтва Руснацох Нового Саду – Войводини Борислав Сакач.
Здогаднїме же першого вечара Фестивалу, пияток, 5. децембра, тиж у просторийох новосадского Шафарику, отримана промоцияЗборнїка драмских текстох Масонка 2, отворена вистава малюнкох з20. Подобовей колониї Стретнуце у Боднарова, хтору у Ґосподїнцох 2024. року орґанизовало Дружтво за руски язик, литературу и културу, и виведзена представа Мам я мужу и милого у продукциї КУД Яким Гарди з Петровцох у Републики Горватскей, док на округлим столє члени того ансамблу бешедовали о стану у театралним аматеризме Руснацох з гевтого боку Дунаю.
