Ище єдна побида дюрдьовских фодбалерох

автор л. вереш
170 Опатрене

ДЮРДЬОВ – У 24. колу Подручней фодбалскей лиґи Нови Сад, хторе одбавене 15. мая, фодбалере ФК „Бачка 1923” зоз Дюрдьова победзели у дербию кола процив новосадского ФК „Партизан”, з резултатом 6:1.

Тото було найлєпше стретнуце дюрдьовских фодбалерох. На самим початку указали борбеносц и закладали ше на шицких часцох терена, та перши ґол посцигли у 18. минути. Пошвидко ище три лабди закончели у ґолу процивнїцкей екипи, у 20, 31 и 33. минути. Фодбалере Партизана були под прициском, алє у 41. минути, посцигли свой перши и остатнї ґол на тим змаганю.

Фодбалере Бачки у другим полчаше були вельо опущенши, бо на їх боку була добра ґол розлика. Милан Роґич у 48. минути посцигнул свой други ґол на стретнуцу, а пияти за Бачку. Процивнїцка екипа ше пробовала врациц до бависка, алє безуспишно. Пред сам конєц змаганя, у 85. минути, Деян Тривунович посцигнул шести ґол за домашнїх, а свой други ґол.

Навияче Бачки, хторих було коло 50, зоз велькима овациями поздравели побиду їх клуба.

После того кола Бачка на 6. месце на таблїчки зоз 36 бодами. Уж ютре их чека стретнуце зоз фодбалерами ФК „Червена гвизда” зоз Нового Саду, а на нєдзелю на домашнїм терену дочекаю фодбалерох новосадского клубу Борац.

ПОВЯЗАНИ ТЕКСТИ