Найлєпши Тамбурови оркестер Керестурцох

автор влдї
1.3k Опатрене

ШИД – По оцени фахового жирия, побиднїк Осмого Фестивалу тамбурових оркестрох „Мелодиї Руского двору 2015” у Шидзе Тамбурови оркестер Дому култури з Руского Керестура, котри наступел под руководительством Юлияна Рамача Чаму.

Друге место по думаню жирия освоєл оркестер КУД „Тарас Шевченко” з Дюрдьова, а треце оркестер КУД „Петро Кузмяк” з Нового Орахова. По гласаню публики, награду достал оркестер КУД „Жатва” з Коцура.

Наградзени достали малюнки з Подобовей колониї „Руски двор” у Шидзе, а Награда ноши мено визначного просвитного и културного дїяча Еуґена Сабола Ґену зоз Шиду.

У ревиялней часци, з годзинову програму наступел Тамбурови оркестер „Равница” зоз Суботици, а як провадзаци змисти Фестивалу були вистава малюнкох з Подобовей колониї „Руски двор 2015” у Лєтнєй владическей резиденциї и вистава стародавних єдлох, ручних роботох и прикраскох на площи коло Културно-бразовного центру.

На спомнутей вистави свойо роботи викладали жени зоз здруженьох „Бикичанки” з Бикичу, „Жридло” з Беркасова, „Перши жени Шиду”, жени з КПД „Дюра Киш” зоз Шиду, як и малженска пара Борислав и Миряна Барново, тиж зоз Шиду.

Змагательох и публику на Фестивалє привитал предсидатель Националного совиту Руснацох Славко Рац, а Фестивал урядово отворел предисидатель Општини Шид Никола Васич.

Пре нєвогодну хвилю, Фестивал отримани у сали Културно-бразовного центру, а на його програмох присуствовали и члени Националного совиту Руснацох, особи з нашого политичного, културного, явного и духовного живота, як и представителє локалней самоуправи Шид.

Фестивалу тамбурових оркестрох „Мелодиї Руского двору” у Календаре репрезентативних манифестацийох Руснацох Националного совиту.

 Вецей фотоґрафиї у окремней ґалериї на правим боку нашого сайту.

Побиднїцки Тамбурови оркестер керестурского Дому култури, долу уручованє наградох представительом побиднїкох. Вецей фотоґрафиї у окремней ґалериї на правим боку нашого сайту (Фото: В. Вуячич)

ПОВЯЗАНИ ТЕКСТИ