РУСКИ КЕРЕСТУР – Пияток, 29. децембра отримана рочна Скупштина Карате клубу „Русин” на котрей анализовани його активносци, а визначени и плани за наступни рок.
На Скупштини присуствовали члени, родичи активних членох и Управни одбор. За найуспишнєйшу каратистку преглашена Анамария Няради хтора освоєла перше место у своєй катеґориї на европским змаганю у Суботици. Тиж похвалєни и Ґлориян Штранґар, як найпоряднєйши и найсовиснєйши каратиста у прешлим року, а Марина Надь, Йована Ноґавица и Сара Планчак закончели рок з положеним испитом за чарни пас.
Дзекуюци младим каратистком активносц Клубу преширена, та тераз єст тренинґи и за дзеци од першей по штварту класу. У новим року и сезони, каратисти ше буду змагац у рамикох ВКФ союзу, чийо критериї висши, алє сам союз припознатши на державним уровню.
