КУЛА – Одборнїки Скупштини општини (СО) Кула на вчерайшей схадзки прилапели Одлуку о анґажованю екстерней ревизиї консолидованого закончуюцого рахунку буджету Општини за 2016. рок, Одлуку о розписованю явней оглашки за оцудзенє нєрухомосцох з явней власносци општини (даванє одредзеного маєтку на лицитованє), Одлуку о прилапйованю початного ликвидацийного звиту за Явне подприємство „Завод за вибудов Кула”, як и Одлуку о снованю и менованю Комисиї за запровадзованє конкурсу за вибор директорох явних подприємствох.
Одборнїки без розправи прилапели звити о роботи за 2016. рок Народней библиотеки Кула и Дому култури Руски Керестур, як и Ришеня о даваню согласносци на статути явних комуналних подприємствох „Комуналєц” Кула, „Водовод” Червинка, „Роботнїк” Сивец и „Руском” Руски Керестур, з хторим статути тих подприємствох усоглашени з новима законскима предписанями.
Дата согласносц на Програму роботи з финансийним планом Дому здравя Кула за 2017. рок у часци хтору ше финансує з буджету Општини Кула, а СО прилапела и Ришенє о даваню согласносци на хаснованє мена општини Кула у назви привредного дружтва у снованю – „Истра Кула арматура” д.о.о. Кула.
Найвецей полемики виволало менованє и розришенє директорох установох чий снователь Општина и розришенє и менованє членох школских одборох. Одборнїк Социялистичней партиї Сербиї др Чедомир Бошкович вимагал же би ше убудуце давало и толкованя о тим прецо ше дакого зменює, односно менує, и же би то була состойна часц Звиту Комисиї за кадрово и административни питаня.
За директора Народней библиотеки Кула знова менована Снежана Таталович з Червинки, а на схадзки зменєни директор Дому култури Сивец Ґоран Янюш и за окончователя длужносци директора тей установи менована Миляна Медоєвич зоз Сивцу.
Предлог о розришеню и менованю трох нових членох Школского одбору ОШ „Петефи бриґада” з Кули зняти з дньового шору прето же ище нє прешол потребну процедуру, односно нє прешол термин у хторим Национални совит Мадярох ма дац свойо думанє о кандидатох. После тей точки дньового шору предсидатель СО Велибор Милойчич претаргнул схадзку, а єй предлуженє заказане за вовторок 9. мая.