НОВИ САД – Вчера коло поладня нєбо у Новим Садзе ше зацмело, а потим пришла буря з гирменьом, каменцом и вельким запором. Велї улїци були заляти з воду, а транспорт бул очежани у шицких часцох городу и пригородским местох, пренєсли вчера медиї и аґенциї.
Каменєц хтори падал бул як пильки и векши, зависно од часци городу, даґдзе и интензивнєйши, та ше аж и улїци забилєли од ляду. У дзепоєдних улїцох на Детелинари, Сателиту, Новим населєню, Подбари и Клиси було води и до пол метера, та даскельо авта остали зарабровани под подвожняками. Под воду були и єдни з найвекших улїцох у Новим Садзе – Булевар Европи и Булевар ошлєбодзеня.
За коло два годзини спадло 50 литри дижджу по квадратним метеру, цо количество хторе штреднє напада у цалим маю.
Екипи з „Водоводу” реаґовали на кризних локацийох кед вельки дижджи, у кадочкох под подвожняками у Партизанскей и Кисацкей улїци, а на поволанки гражданох реаґовали и огньогасци, та вицаговали воду з пиньвицох, гварене за 021.
Вчерайши паданя заш лєм нє були найвекши зазначени, бо 25. мая 2015. року за даскельо годзини спадло два раз вецей дижджу – и до 142 литри по квадратним метеру у пригородских местох, а у Новим Садзе медзи 80 и 90 литри, пренєсол портал 021.