РУСКИ КЕРЕСТУР – Вчера вечар до Руского Керестура сцигли 30-еро дзеци од 10 по 16 роки, и пейц одроснути особи з України, котри ту пребуду по 30. авґуст на екскурзиї и одпочивку по наших парохийох и других местох.
До Керестура их припровадзела заменїца амбасадора України у Беоґрадзе, Наталия Маркевич, а як за Рутенпрес виявела, дзеци зоз Житомирскей обласци, а ту пришли до позитивного штредку понеже мали дотика зоз войновима зраженями у тей жеми.
Дзеци буду змесцени у интернату керестурскей Школи „Петро Кузмяк”, а костирац ше у просторийох парохийного Каритасу. Домашнї им нєшка вечар у Каритасу пририхтаю друженє з младима волонтерами, а на соботу дополадня одход до Водици им орґанизую шестри Служебнїци.
Як предвидзене, кажди дзень дзеци нащивя даєдно место, та нєшка буду у Коцуре, а надалєй у Новим Садзе и Петроварадину, потим у Кули, у Бачким Петровцу, Шиду, Беоґрадзе и Сримскей Митровици.
Приход дзецох на поволанку нашей заєднїци орґанизовала и финансує Амбасада України у Беоґрадзе, а їх пребуванє обдумали нашо парохиї и Каритас.
