Каждого лєта кед у наших здравствених установох резерви креви сцигню по сам конєц, а зоз заводох за трансфузию креви апелую на добродзечних давательох же би помогли и дали крев и так виратовали животи пациєнтох.
Влєце, кед рочни одпочивки, здравствени установи робя зоз зменшаним капацитетом и потреби за креву и кревовима дериватами зменшани, медзитим, у дзепоєдних периодох панує вельке поглєдованє. Насампредз, то транспортни нєщесца, котри у сезони путованьох частейши на наших авто-драгох, алє и рижни други нєпредвидзени интервенциї.
Завод за трансфузию креви Войводини и того лєта сцигол по критичну точку, алє дзекуюци апелом и велькей потримовки медийох, до помоци пришли порядни давателє, та креви було достаточно.
КРЕВ МОЖЕ ДАЦ КАЖДА ОСОБА
У Заводзе за трансфузию креви Войводини подобни проблем, а о тим зме побешедовали зоз Зорицу Белич, задлужену за одношеня зоз явносцу.
– Так повесц, кажде лєто ше случує исте – потреби за креву векши, а давательох менєй. Насампредз, прето же людзе на рочних одпочивкох, путую, одсутни су, одходза зоз своїх местох биваня и крев нє можу дац узвичаєних поступкох, на кажди три-штири мешаци. Алє, анї влєце велї нє можу дац крев, бо условия и здравих людзох поставаю вше чежши, вистати су, вичерпани пре хвилю, та нє маю одвитуюци уровень гемоґлобину. После контроли видзиме их здравствени стан, и кед нє задоволюю, одбиваме їх, цо нє значи же о мешац, кед постанє нормална хвиля, и їх хемоглобин ше дзвигнє на нормални уровень. Кед ше шицко тото збиє на єдно место, хиби нам крев и кревово деривати. Найкритичнєйши нулта и А ґрупа, односно шицки RH неґативни ґрупи – гвари Зорица Белич.
Прето ше вше влєце и баржей апелує на давательох креви, а интересантне же зме були и шведкове даскелїх вельких транспортних нєщесцох котри ше случели на наших авто-драгох. Теди директно апелує на длугорочних и преверних давательох, и вони ше радо одволую.
Заняти у Заводу трансфузиї креви ше трудза же би ше резерви креви нє зменшали, односно же би их нє нєстало цалком.
– През цали рок зоз Червеним крижом маме вельо трибини и преподаваня на котрих апелуєме на давательох креви. То стимулує нових давательох, гоч ше велї з нїх и сами, у одредзеним периодзе, здогадню же треба дац крев. Ми кажди рок доставаме нових и нових давательох, цо барз добре, алє велїх мушиме и одбиц. Їх крев, за їх здравє добра, алє нє и же би були давателє креви.
У ВЕРБАШЕ ЄСТ ДОСЦ РЕЗЕРВИ
Оддзелєнє за подмирйованє креви и кревових дериватох у Общим шпиталю у Вербаше тих дньох нє ма проблеми, алє, як и у векшини шпитальох през лєто, зменшане число давательох креви. Началнїца того оддзелєня и специялиста трансфизиолоґиї др Миряна Наков гварела же у периодзе кед мали найвекши поглєдованя, удало ше анимировац порядних давательох, а помогол им и шпиталь зоз Суботици.
– Потреба за креву ше того року ґенерално звекшала. Насампредз, пре факт же того лєта оперативни процеси чечу без паузи и операциї ше окончує каждодньово, алє и пре тото же маме вше векше число хорих людзох и то праве тих хторим потребни одредзени количества креви. Нажаль, популация нам вше старша, млади одходза зоз держави, та и то єден зоз проблемох о хторим треба роздумовац – щира дохторка Миряна Наков.
Зоз трансфузиї у Вербаше гваря же ше през лєто звичайно зменша число лю-дзох хтори даваю крев прето же одходза на рочни одпочивки, та и фирми чежше можу пущиц роботнїкох на два шлєбодни днї, а того року окремни проблем и вельки горучави хтори при гражданох и так виволую одредзени здравствени почежкосци.
– Ми апелуєме на гражданох же би пришли дац крев до дзешец годзин рано, нїяк познєйше, прето же хвиля наисце чежка и за здравих людзох. Зоз процесом даваня креви приходзи до пошвидшованя циркулациї, ширеня кревових судзинох и виход на таки високи температури може мац озбильни пошлїдки – визначела др Наков.
НЄЩЕСЦА НА АВТО-ДРАГИ
Ситуацию додатно обтерховює авто-драга хтора блїзко при Вербасу, та кед ше трафи даяке транспортне нєщесце, найчастейше ше покалїчених превожи перше до вербаского шпиталю, а потим до Нового Саду, або далєй. У транспортним нєщесцу у хторим автобус хтори превожел польских туристох, углавном дзеци, зишол зоз драги, страдала єдна особа, а вецей особи покалїчени. Шпиталь теди професийно одреаґовал и шицки покалїчени були хоспитализовани за барз кратки часц. Праве пре таки и подобни ситуациї Оддзелєнє за трансфузию муши мац векши залихи креви и кревових дериватох.
– Давателє креви ше звичайно сами здогадню же час же би дали крев и у Трансфузиї наглашую же су барз шорови и чувствительни, без огляду же нови олєгчаня за добродзечних давательох нєт. Иснує уредба зоз хтору ше давательом муши оможлївиц два шлєбодни днї, як и нєплаценє партиципациї, алє, як гваря, то нїґда нє пресудне за давательох. На акциї ше поволує прейґ медийох, алє ше порядних давательох вола и особнє.
– Медиї нам наисце вельо помагаю и ми им дзекуєме на тим. Тиж так, нашо давателє барз сердечни и накадзи их поволаме и повеме им же су нам потребни, такой ше одволаю. Хторишик дзень нам бул єден роботнїк з огньогасней станїци хтори о даскельо днї анимирал ище даскелїх колеґох же би пришли дац крев. Вельке число давательох маме и у Коцуре, у їх станїци, алє и у других валалох, як цо то Руски Керестур. Одличне сотруднїцтво маме и зоз рускокерестурску ґимназию дзе єст вельо младих, а праве вони творя будучносц – гвари дохторка Наков.
У авґусту орґанизовани шейсц акциї добродзечного даваня креви и то три у Вербаше, у Бачким Добрим Полю, та и у Крущичу. Акция у амбуланти у Руским Керестуре будзе 27. авґуста, а тераз найбаржей потребна А и О кревова ґрупа.
ВОЙВОДЯНЄ РАДИ ПОМОГНУЦ
Добродзечни давателє креви з Войводини найлєпши у Сербиї. У тих крайох крев даваю пейц одсто людзе, док у
Београдзе лєм два одсто. Исто так, и у нукашнєй Сербиї давателє креви нє барз активни. Иншак, по 2020. рок Шветова орґанизация жада обезпечиц осем одсто давательох креви. Нєшка лєм 62 держави маю полни резерви креви од гражданох котри даваю крев без надополнєня и анонимно, а 40 держави ище вше завиша од креви плацених давательох, лєбо од членох фамелиї пациєнтох, найчастейше кед то муша поробиц.
Циль Заводу за трансфузию креви Войводини же би ше преширело фамелию давательох, та так уж прешлого 2016. року зазначени 2 600 нови члени.
КРЕВ ПОВЯЗУЄ ЛЮДЗОХ
Кед же цошка повязує шицких людзох на швеце то сиґурно и крев. Єст на милиони приповедки у котрих нєпознати, дзекуюци трансфузиї креви, виратовали особи зоз меном и презвиском. Ище вецей єст тих, цо су нє написани.
Помогнуц людзом, то и основни мотив добродзечним давательом креви. Нажаль, ридко єст пациєнтох хтори нє сцу прияц крев. То, углавним члени одредзених вирских заєднїцох, прешвечени до безкревового лїченя.
