НОВИ САД – На нєшкайшей, 69. схадзки Управного одбору (УО) Новинско-видавательней установи „Руске слово”, по Явней поволанки за вибор директора розписаней 27. юлия, од штирох приявених кандидатох, найвецей гласи достал др Борис Варґа.
УО зашедал у полним составе (дзевец особи), за др Варґу гласали седем особи. Потерашнєй директорки НВУ „Руске слово” Мартици Тамаш мандат, други по шоре, тирва под 19. септембер, а тоту одвичательну функцию др Варґа пребера 20. септембра. Мандат директорови тирва штири роки.
По Закону о явним информованю и медийох, хтори ступел на моц 2016. року, вибор директора окончує УО, а нє национални совит националней меншини чий єй снователь.