Дїла и любов ґу свойому

автор мгк
1.1k Опатрене

Нашо грекокатолїцки стари, уж и виковни церкви, красни и функционални, гоч су направени ускромних условийох, алє до нїх уложене вельо роботи, добрей дзеки, схопносци, дари и любови. Владимирова обнова церковних царских дзверох у Новим Садзе, як и велї други роботи, єден приклад тей любови.

Секретар Церковного одбору у Новим Садзе Владимир Римар нєдавно обновел и позлацел часци царских дзверох на старим иконостасу у церкви Святих апостолох Петра и Павла, за цо требало вельо схопносци и сцерпезлївосци, у чим му зоз совитами и материялом помогнул искуснєйши о. Михаил Холошняй, управитель парохиї у Ґосподїнцох и капелан дюрдьовски.

Фундаменти церкви у Новим Садзе пошвецел крижевски владика Константин Станич ище 11. юлия 1820. року, а будована є 18 роки. И теди ище було роботи у нукашньосци, так же иконостас найвироятнєйше поставени 1847. року.

Його древену архитектуру направели браца Маркович, як и у дзепоєдних других церквох, наприклад у православней Успенскей у Новим Садзе. Икони на иконостасу дїло познатого уметнїка Арси Теодоровича (як и у Руским Керестуре, Коцуре и новосадскей Алмашскей церкви). Арса мал ученїка Йована Йовановича, та и його икони єст у нашей церкви у Новим Садзе, цо шицко шведочи о духовних, историйних и уметнїцких вредносцох иконостасу у нашей церкви св. апостолох Петра и Павла.

ПОТРЕБНИ СХОПНОСЦ И ДАРИ

Дас пред роком и пол було очиглядне же позлацени филиґрански прикраски на царских дзверох, дуборез, резбария и шарки попукани, розкивани, так же могли спаднуц. Прикраски представяю маслиново лїсца и плоди, як знак привиту Господа Исуса Христа у слави, и то требало оправиц.

– Парох новосадски о. Юлиян Рац ше ми опитал же чи их можем оправиц и позлациц, я прилапел и так почала обнова – приповеда Владимир. – Бул сом у Дюрдьове на поради зоз о. Михаилом Холошняйом и вон гварел же помогнє кельо може. Вон уж вецей роки обнавя иконостас у Дюрдьове и ма одредзени материяли, хтори дал и за новосадску церкву.

Дал клий – природне лїпкадло, шампаньску крейду, болоньску крейду и жовти и червени полимент, цо оможлївює пасма и подлогу за злато. Значи, вецей пасма єст пред позлату. Шицко то природни материяли. На концу ше наноши ценки златни фолиї – потолковал Римар.

Скорей ше од єдного дуката од 3,5 ґрами, 23-24 каратного злата, правело 200-250 фалати фолиї велькосци 8х8 цм. Нєшка ше зоз сучасну технолоґию направи и до 1 000 таки фолиї з истого количества злата.

З малим количеством злата мож обложиц вельку поверхносц, цо значи и же на иконостасу нєт вельо того драгоциного металу. Одредзене число злата у фолийох за новосадску церкву обезпечел о. др Роман Миз.

УМЕТНЇЦКО-РЕМЕСЕЛСКА РОБОТА

По Римарових словох, робота з тоту фолия барз „пипава”. Муши ше и осторожно дихац, же би ше нє роздуло фолиї хтори стоя на єленьовей скори. Нє шицко єдно анї у яким трикове ше роби, бо електрицитет може розлєтац и очкодовац ценке злато, хторе вец нє мож позберац.

– Нє мог бим робиц без помоци о. Михаила Холошняя – гварел Владимир. – Пред тим требало закончиц тиж зложени тишлїрски роботи, составиц розламани часци, дуборези, и направиц нови. Доправени вирезбарени фалатки и направени додатки, же би тримали дуборези.

Як потолковал Римар, стару позлату требало зняц, бо була як шмирґла, нє вигладкана и нє могло ю очухац и репаровац. Дим, прах и стара позлата у церкви ше хемийно зєдинєли и тоти поверхносци нє могло очухац же би остало лєм злато.

Зато требало шицко вистругац, ошкрабац зоз специялним алатом до древа и вец древо позлациц. То уметнїцко-ремеселска робота. Дуборез на царских дзверох у Новим Садзе нє плїтки, ма глїбши часци, хтори чежше доступни инструментом. Шицко треба робиц сцерпезлїво, помали, з вельку прецизносцу и фахово. Заш лєм, поробене є.

За познєйше остало обновиц и позлациц луки на царских дзверох, як и дуборези на бочних дзверох на иконостасу.

– До тих крайох пришли худобни людзе, нашо предки, алє сцели мац свою церкву. Кец вони могли у тих скромних условийох створиц цошка вредне, ми треба же би тото и зачували. Шицки тоти роботи би дахто тельо наплацел, же би то наша Церква нє могла плациц. Алє, пришвечело ше же би за Вельку ноц символи привиту и воскресеня Исуса Христа заблїсли з новим шветлом, и то и направене – заключел Владимир Римар.

ПАРОХ НОВОСАДСКИ: БАРЗ ЗМЕ ПОДЗЕКОВНИ

Парох новосадски о. Юлиян Рац наглашел же церковна заєднїца барз подзековна секретарови Церковного одбору Владимирови Римарови на окремним закладаню у обнови церкви, алє и другим у Церковним одборе и шицким хтори доприноша же би ше Церкву материялно и духовно отримовало и розвивало.

– На царских дзверох поробена єдна нєодложна, важна и зложена робота, у чим Владимирови помогнул и о. Михаил Холошняй, та и йому дзекуєме – виявел о. Рац. – Подобно, предстої обнова и на дияконских, бочних дзверкох.

Коло церкви и будинкох єст ище надосц роботи. Добре же положени циви за одцеканє води на храму, на чим тиж Римар бул окреме анґажовани, бо требало обезпечиц вельо документи и дозволи од компетентних службох и институцийох.

Медзитим, заш лєм маме влагу у будинку церкви, можебуц атмосферску, од вонка, а можебуц и од долу, з оглядом же будинок нє изоловани од влаги. Парохийни будинок стари, та и його треба обновиц – гварел о. Юлиян.

28-29 I TOTU NS cerkva calaПо його словох, нєпреривни проблем то и барз фреквентни транспорт, можебуц и найфреквентнєйши у Новим Садзе, праве у улїцох дзе будинки нашей церкви и парохиї, цо виволує очкодованя на тих будинкох.

ОБЛАКИ ПОЛОЖЕНИ БЕЗ СКЕЛОХ

Ище 1994. року, витор розкивал стари облаки на турнї, почали ше вивальовац и могли спаднуц долу. Теди парох новосадски бул о. др Роман Миз, хтори ше опитал Владимирови Римарови же чи их може оправиц, односно направиц нови.

Владимир пристал, алє то нє було лєгко, бо облаки стоя коло дзвонох, а турня до крижика висока 36-37 метери. Облаки вельки коло 1,3 метери зоз 2,7 метери и єст их штири коло дзвонох, и ище два додатни.

Римар штудирал як их заменїц без скелох, та надумал же их направи у часцох, же би их могло високо дзвигнуц и монтирац, и од теди там и стоя.

– Направел сом облаки спрам потреби и можлївосцох, а у тим ми помагал Владимир Рац, хтори тераз у Канади – виприповедал Владимир. – Бакар за рошти на облакох купени у Беоґрадзе, з тим же на нїх єст и челїчни рошти.

Помагали и Владимир Кочиш и Владимир Сакач, так же зме од огньогасцох пожичели паньваши и ременї, пошли горе, познїмали стари облаки и положели нови – здогадує ше Римар.

Окрем того, зоз дубовини вон направел и постамент за швичнїки, а зоз баґрену постамент за кивот, олаґовал их, та и вони прикрашую и, дзекуюци йому, служа свою намену у нашей церкви у Новим Садзе.

ПОМАГА И У ДРУГИХ ПАРОХИЙОХ

Гоч по образованю правнїк, а по професиї новинар, Владимир Римар уж познати як искусни тишлїр и „езер майстор”, та го волаю до других местох и парохийох же би помогнул у даякей роботи. Так го монахиня Ярослава замодлєла же би у Новим Садзе у манастире шестрох служебнїцох направел олтар у форми чаши за причасц, у їх каплїци, цо вон поробел, а потим и наш владика пошвецел тот олтар. Тиж, Владимир у шидскей парохиї мал вельо керамичарски, тишлїрски и водоинсталатерски роботи, а у парохиї у Руским Керестуре и тераз стої и хаснує ше орманчик за матрикули, хтори вон направел.

 

ПОВЯЗАНИ ТЕКСТИ