КОЦУР – Госци з Польскей, з Оддзелєня славистики на Педаґоґийним универзитету у Кракове – професорка Олена Дуц-Файфер и студенти Петро Козминьски и Каролина Новак, свою нащиву нашим местом и институцийом закончели вчера, 14. мая у Коцуре, дзе були у Етно-клубу „Одняте од забуца“ и у грекокатолїцкей церкви.
Тиж присуствовали и на Велькей Служби Божей, хтору служел коцурски парох о. Владислав Рац, а у Етно-клубу их дочекали домашнї Аранка Медєши и Моника Гарди.
Предсидателька Етно-клубу Аранка Медєши госцом з Польскей бешедовали о предметох з прешлосци трох народох котри жию у Коцуре, а мали нагоду видзиц и роботи на преширйованю просторийох Клубу, хтори почали тих дньох.
