РУСКИ КЕРЕСТУР – Вчерайши Шветови дзень защити животного штредку з рижнима активносцами означени и у рускокерестурскей дзецинскей заградки „Цицибан” ПУ „Бамби” з Кули, а традицийне припознанє „Цицибану” за активносци у еколоґиї „Желєни лїсток” того року достала снователька и предсидателька валалского Еколоґийного руху „Желєни персцень” др Леона Доротич Ґутеша.
„Желєни Лїсток” др Доротичовей, котра ше вецей як 20 роки найвецей закладала за ожелєньованє валалу и ришованє еколоґийних проблемох, дзеци и воспитачки, на чолє з їх главну виховательку Емилию Костич, уручели на пригодней програми у дворе дзецинскей заградки.
Пред вчерайшим Шветовим дньом защити животного штредку дзеци цали тидзень бешедовали о еколоґийних темох, правели бависка з рециклажних материялох, а виробели и еколоґийни плакати хтори вчера виложели на капуру дзецинскей заградки.
Пред вечаром дзеци отримали и традицийни Маскенбал, на хторим участвовали шицки воспитни ґрупи, окрем наймладшей, яшельковей. Маскировани дзеци ше даскельо раз прешпацирали през центер валалу, а привитали их велї Керестурци.