БЕОҐРАД – На вчерайшей схадзки Совиту за национални меншини Влади Републики Сербиї, з хтору предшедовала министерка державней управи и локалней самоуправи Ана Брнабич, винєшене же после 15 рокох активовани Буджетни фонд за национални меншини з буджету спомнутого министерства, як и же з нього уж опредзелєни милион 800 000 динари за финансованє проєктох з обласци култури, иноформованя, образованя и службеного хаснованя язика и писма националних меншинох у Сербиї -сообщене з Министерства.
Як гварела предсидателька Совиту за национални меншини министерка Брнабичова, спомнути 1,8 милиони динари дополнююци средства, попри стаємних хтори национални совити (НС) националних меншинох порядно доставаю од Канцелариї за людски и меншински права Влади Сербиї.
Попри представительох НС-ох националних меншинох у Сербиї, медзи нїма и предсидателя Вивершного одбору НС Руснацох Желька Ковача, на вчерайшей схадзки у Беоґрадзе присуствовали и представителє министерствох – вонкашнїх дїлох, правди, култури и информованя, просвити, науки и технолоґийного розвою, як и Канцелариї за людски и меншински права и Управи за сотруднїцтво з церквами и вирскима заєднїцами.
Як поведзене у сообщеню, а то за Рутенпрес потведзел и Желько Ковач, схадзка отримана у конструктивней атмосфери и посцигнута догварка о способе даваня звитох о имплементациї Акцийного плану за национални меншини, а порадзене и же уж нєшка, у орґанизациї Канцелариї за людски и меншински права, почнє обука за НС-ти о проєктох хтори финансує ЕУ.
Нови предшедуюци Координациї НС-ох и предсидатель НС Мадярох Єне Гайнал на схадзки гварел же НС-ти подзековни на уступкох хтори поробени пре инклузию совитох до провадзеня витворйованя Акцийного плану, як и на порихтаносци Министерства за державну управу и локалну самоуправу и Канцелариї за людски и меншински права же би з вименку методолоґиї по тим питаню створели партнерске одношенє з националнима совитами.
Членом Совиту за национални меншини Влади Сербиї на схадзки представени Перши и Други звит о запровадзованю Акцийного плану за национални меншини, витворени активносци державних орґанох, як и законски ришеня на чиїх вименкох и дополнєньох ше тераз роби. Представителє НС-ох присутних упознали и з Нарисом закона о буджетним фонду за национални меншини, хтори предклада Координация НС-ох.