НОВИ САД – У Руским културним центре (РКЦ) стреду, 24. мая, отримана програма „Дзе(нь) младосц(и)? – Ту є уж 45 роки – МАК!”, хтора була пошвецена МАК-овей 45-рочнїци, а почала з виставу 35 числох того часопису з вецей периодох.
У другей часци програми участвовали и дебатовали и дзепоєдни бувши редакторе МАК-у – Ирина Гради Ковачевич, Гавриїл Колєсар, Борис Варґа, а тиж и терашня редакторка Мая Зазуляк. З каждей часовей епохи пречитани виривки з МАК-у, хтори млади интерпретовали прилагодзено часу на хтори ше одношели, та их читали „пионир” (Йован Живкович), „денс-дзивка” з осемдзешатих рокох прешлого вику (Павлина Шепински), „дизелаш” (Иван Канюх), „панкер” (Лука Вуячич) и модерни леґинь нєшкайшого часу (Мирослав Малацко).
О правопису и правилним акцентованю у руским язику бешедовала Ана Римар, котра у МАК-у пририхтує рубрику „Так и нїяк иншак”, а ґрафични дизайнер МАК-у Златко Емейди приказал кратши видео-прилог о тей часци пририхтованя часопису.
У трецей часци тей интересантней програми отримани концерт руских забавних шпиванкох з албумох хтори МАК обявел у прешлих рокох, а шпивали их Кристина Афич, Жарко Остоїч, Павле Рац, Дзивоцка шпивацка ґрупа Дому култури Руски Керестур, Сашо Палєнкаш, Танита Ходак, Саня Дивлякович, Мирослава Даждиу и „Crazy Cousins”. Модераторки програми були Александра Живкович Бучко и Саня Дивлякович, а музичну часц програми водзели Лидия Костелник и Андрей Орос.
Велька сала РКЦ була полна з публику, а орґанизаторе програму украшели и з нєкаждодньову сценоґрафию и шветлоснима ефектами.
Манифестацию „Дзе(нь) младосц(и)? орґанизовал РКЦ и МАК, односно НВУ „Руске слово”, з потримовку Роботного цела за младеж Националного совиту Руснацох.