РУСКИ КЕРЕСТУР – У новорочней ноци, з традицийним огньометом котри бул виштрелєни на пол ноци у центру Руского Керестура, дочекани Нови 2019. рок, а источашнє є означени и зоз церковнима дзвонами.
Найвироятнєйше пре диждж котри падал скоро цали вечар, нє таке вельке число людзох пршло на центер, алє огньомет бул богати и красни як и скорейших рокох. Орґанизатор огньомету и того року була Месна заєднїца Руски Керестур, а по законских предписаньох було обезпечене дежурство огньогасцох и медицинскей помоци у случаю наглей потреби.
У Катедралней церкви св. оца Миколая у новорочней ноци, 30 минути после пол ноци, бул традицийни Новорочни молебен котрому присуствовало красне число вирних, а служели домашнї священїки.
У погосцительних обєктох орґанизовани дочек з музику бул лєм у ресторану „Лонґов”, а ресторан „Червена ружа” робел поряднє, дзе було тиж госцох. Младеж мала нагоду превешелїц ше у дискотеки „Амадеус” дзе нє було нїч окреме орґанизоване.
Попри тим, велї Керестурци дочек Нового року преславели у своїх домох, як младши, так и старши ґенерациї. Було тих котри за дочек одпутовали на площи векших европских городох, алє и до Нового Саду, Беоґраду або на Златибор, та и тих котри славели у векших ресторанох у околних местох.
