БЕОҐРАД – По законченю схадзки Координациї националних совитох националних меншинох, штварток 10. мая, отримана и схадзка Совиту националних меншинох на котрей предшедовала премиєрка Влади Сербиї и предсидателька Совиту Ана Брнабич.
Брнабичовей то було треце предшеданє, присуствовали компетентни министрове у Влади, представнїки Европскей униї, а спред Националного совиту Руснацох бул предсидатель Вивершного одбору Желько Ковач.
За Координацию було найзначнєйше же би єй предшедуюци Єне Гайнал виложел усоглашени становиска на тей схадзки Совиту о явней розправи о Нарису Закона, понеже од седем заувагох котри вони придали у явней розправи, барз мала часц прилапена. По тей основи, Координация вимагала нову схадзку Роботней ґрупи у явней розправи з премиєрку, на котрей би представнїки розтолковали ище раз спомнути зауваги, скорей як цо Закон войдзе до скупштинскей процедури.
На схадзки Совиту Брнабичова винєсла информациї о значносци проєкту Адресного реґистру, а министер у Влади и заменїк предсидателя Совиту Бранко Ружич представел запровадзени и плановани активносци. Ивана Антич, помоцнїца министра державней управи и локалней самоуправи, бешедовала о запровадзеней Явней розправи о Нарису Закона о националних меншинох.