Нє ципелар є, а анї нє шустер, як би гварели нашо стари, та заш лєм, ма вязи и з єдним и з другим. Правда тота же Юлиян надпатра машини италиянских подприємствох у хторих ше правя ципели и патики за познати фирми з Италиї и Французкей.
Юлиян Медєши з Вербасу знанє на шустерских машинох здобул у дакедишнїм ципеларским ґиґанту з Кули, у „Аски”, дзе робел шейсц роки у погону як електричар, за цо ше у найвекшей мири и школовал. Понеже роботи зоз струю було вше менєй, вше частейше робел на машинох за хторима були шнайдерки. У „Аски” Медєши здобул искуство у пририхтованю машинох за продукованє одредзених часцох обуї, а концом 1998. року ше преруцел до фирми „Родич” дзе петнац роки робел у ИТ сектору.
Роботи зоз машинами, алє и програмованє му ше познєйше ище як добре здали кед 2013. року пошол на розгварку до италиянскей фирми „ЕУРОИН”, хтора услужно прави ципели и патики за французки и италиянски познати марки як цо „Луй Витон”, „Ґучи”, „Александер Мек Квин”, „Баленсияґа”…
ПАР ЦИПЕЛОХ – ТИСЯЧКА
– Спомнуте подприємство нє ма пласман на тим тарґовищу, нам материяли и фурми дизайнерох сцигую зоз Италиї, и ми вец по тих фурмох робиме. У нас ше прави скоро цала ципела, лєм талпи, односно дьони нє лїпиме. Тому подприємству нєпотребна реклама. О нїм, алє и о наших майстрох хтори у нєй робя, баржей бешедую модели хтори ше находза на найпознатших модних пистох. То ципели и патики за високу моду. Од кеди я робим нє направели зме анї єден пар ципелох хтора кошта менєй як 700 евра – гвари Юлиян.
У подприємству „ЕУРОИН“, хторе ма свойо филияли у Уґриновцох у Сриме, у Фекетичу и Кули, єст коло 700 роботнїкох. Медєши гвари же су окреме добри як поднїмателє, плаца вше на час, аж дакеди и дзень, два скорей. У Фекетичу погон крашнє ушорени, меркує ше на роботнїкох, а вше ше и уклада до преширйованя роботи. Конкурс вше отворени, а по Юлиянових словох, у Кули пошвидко будзе отворени обєкт хтори будзе мац коло 400 занятих.
Перши штири роки вон робел у Фекетичу, а пред роком, кед тамтейших майстрох обучел за роботу, прешол до Кули и тераз до старого погону одходзи лєм теди кед треба надпатрац своїх шеґертох. У Кули тераз отримує погон и задлужени є за шицко цо ма вязи зоз струю, механїку, алє окреме надпатра и усоглашує машини за правенє часцох обуї.
– Моя робота же бим вєдно зоз технолоґом правеня обуї надпатрал систему як машини буду пошоровани и же бизме кажду добре порихтали. За даєдни машини мушим вельо нового научиц, бо тераз єст и програмерски машини хтори ше точно так намесца же би зробели одредзену часц ципели, та ту треба буц окреме осторожни и точни – гвари Медєши.
МАЙСТРОВЕ ЗА ДЗЕШАТКУ
За роботу сервисера спомнутих машинох чловек муши мац барз вельо сцерпеня, а Юлиян гвари же тоту прикмету ма. Медзитим, без огляду на швидкосц и велькосц нових машинох, у тим подприємстве ше досц хасную старши модели машинох, бо ше ридше губя, а и за нїма муши стац чловек, та то єдна сиґурносц вецей.
– Правда же у Сербиї нашли туньшу роботну моц, бо Италия у Европскей Униї и там нєт вельо роботнїкох за таку роботу. Медзитим, ми маме наисце вельо квалитетних майстрох хтори одвичательни и способни, и думам же и то пресудне за правенє таких драгих и луксузних ципелох. У Войводини єст вельо добрих ципеларох и шнайдерох, а у нашей фирми шицки майстрове одлични – прешвечени Медєши.
Вельку увагу ше поклада на точносц у вирабяню модела познатих фирмох. Предносц ше дава квалитету, бо ципела муши буц прецизно зробена, точно по мерадлох дизайну. Гришки ше нє толерую, анї найменши, а кед же ше справя, ципелу ше паре и роби ознова. Як гвари Юлиян, контроли єст барз вельо, алє то и добре. Накадзи ше пороби штири або пейц операциї, шлїдзи контрола, а таки контроли лєм за єден пар ципелох єст голєм штири або пейц.
– За познати лоґо „Луй Витона” ше точно зна дзе ше и на хторей часци ципели находза иницияли, а дзе лоґо зоз квециком и тото ше цилює зоз окремну машину, хтора потим чувствительну скору прештригнє на точно одредзеним месце – гвари Юлиян и додава же ше ту роби зоз барз драгим материялом, углавним зоз скору, та прецизносц муши буц заґарантована.
– Правели зме ципели зоз єленьовей скори, алє и зоз гадовей скори, конкретно зоз скори питона. Паметам же єдна пара таких ципелох коштала коло 2 700 евра – гвари Медєши, а цо найинтересантнєйше, анї єдна з тих ципелох ше му нє пачи.
– То ципели за високу моду и часто су нє по моїм смаку. Нє пача ше ми як фарби наскладани на тих ципелох, барз падаю до оч. Правели зме и ципели хтори коштали прейґ тисяч евра, а я би их нє ношел анї кед би ми их дали задармо – щири Юлиян.
ЦИПЕЛИ 20 000 ЕВРА!
У спомнутим подприємстве шиє ше и ципели по жаданю, так же у єдней сериї єст таки лєм єден пар ципелох. Звичайно ше таки модели правя з руками, односно, робя их єден або двоме майстрове хтори специялно за тото обучени. Часто ше за таки модели хаснує окремна технїка „врнчанє“ зоз хтору ше з руку виписує по скори. Пар виробених ципелох кошта и до 20 тисячи евра.
НОРМАЛНЕ ЧИ НЄ?
Раз ше у Медєшовим обисцу случело же Юлиян єдному з дзецох порубйовал панталони, а праве у тот час його супруга Даря сцела заквачиц слику на мур. У тей хвильки кед Юлиян шедзел за машину, а Даря коло нього з млатком забивала гвозд, вошол нука сушед. Длуго му толковали же чом им то зошицким нормалне…
