РУСКИ КЕРЕСТУР – Школяре осмей класи рускокерестурскей Основней школи „Петро Кузмяк”, вєдно з професорку математики Наталию Будински, стреду, 19. априла, прейґ скайпу бешедовали з парняками з Индиї, на поволанку наставнїци, Нири Митал.
Керестурски школяре того року уключени до ґлобалней акциї „Супер смужки” („Awesome squiggels”), хтора подрозумює креированє єдного лїстка зоз штирома смужками на основи хторих школяре вец маю направиц рисунки, а наставнїки тоти рисунки потим кладу на дружтвени мрежи.
У спомнутей акциї ше школяре з вецей крайох швета повязую и прейґ скайпу, дзе чераю искуства и єдни другим указую свойо роботи, та так и керестурски осмаки стреду указали рисунки школяром з Индиї.
Як за Рутенпрес гварела професорка Будински, тото друженє було наисце успишне, школяре барз добре комуниковали зоз своїма парняками, а найвецей бешедовали о школи, путованьох, хвилї и подобним.