РУСКИ КЕРЕСТУР – Школяре Основней и штреднєй школи „Петро Кузмяк” з Руского Керестура були успишни на окружним змаганю зоз сербского язика як нємацеринского у Кули, на општинским змаганю зоз биолоґиї у Червинки, а змагали ше и на оркужним з анґлийского язика у Зомборе.
Зоз сербского язика як нємацеринского у катеґориї седмей класи найлєпши були Керестурци, та перше место завжала Виолета Чизмар, а друге Марина Джуджар. У катеґориї осмей класи Леонтий Сивч завжал перше место, а Леон Юрич треце место.
З осмей класи було шицкого 12 змагательох, з Керестура ше змагал ище и Алексей Мудри, а зоз седмих класох Мая Ерделї и Лука Иличич. Змагали ше и школяре зоз Кули, Лалитю и Зомбора. Керестурских школярох за змаганє пририхтала наставнїца Мария Балїнт.
На општинским змаганю з биолоґиї 17. марца у Червинки, з керестурскей Школи наступели 12 школяре од шестей по осму класу. Леон Юрич, школяр осмей класи, освоєл треце место, а понеже першого места нє було, Леон по числу бодох бул други и автоматски идзе на окружне змаганє.
Теодора Русковски тиж була треца, алє єй дальши пласман ище нєпознати, док ше нє прировнаю боди зоз змаганьох у других штредкох. Ребека Семан у катеґориї шестей класи тиж була треца, а єй дальши пласман тиж будзе накнадно познати.
З керестурскей школи змагали ше ище и Ґлориян Штранґар, Даница Плавшич и Мая Сивч з пиятей класи, Дарко Провчи и Павле Гербут зоз шестей, Павле Новта, Лука Иличич и Мая Ерделї з седмей, а Деян Гарди з осмей класи. За змаганє их пририхтала наставнїца Єлена Шомодї.
На окружним змаганю зоз анґлийского язика за штварти класи штреднєй школи, змагали ше два школярки з Керестура, Дорис Бучко зоз руского оддзелєня Ґимназиї и Йована Вуїнович зоз туристичного напряму, алє ше нє пласовали далєй. Пририхтали их наставнїци Лїляна Фина и Кристина Йокич.
