ПЕРЕЧИН (УКРАЇНА)/РУСКИ КЕРЕСТУР – Фодбалска екипа ветеранох рускокерестурского „Русину” од 27. по 29. май участвовала на медзинародним турнире фодбалерох-ветеранох у малим фодбалє у Перечину, у України, у месце з хторим Руски Керестур ма подписане Спорозуменє о сотруднїцтве.
Турнир, як и други културни и спортски програми, 28. мая орґанизовани з нагоди уж 618. Дня Перечину, так же госци на тих збуваньох були представителє городох и местох з дзешец державох з хторима Перечин побратимени, лєбо ма подписани спорозуменя о сотруднїцтве.
Попри Керестурцох, на турнире у малим фодбалє участвовали домашнї фодбалере з Перечину, потим зоз Словацкей и з Польскей, а ветеранє-фодбалере „Русину” освоєли друге место. У финалним змаганю страцели од домашнєй екипи з 2:1, а пред тим, у квалификацийним змаганю победзели екипу зоз Словацкей зоз 4:1.
За керестурску екипу бавели Юлиян Варґа, Владимир Олеяр, Владимир Кочиш, Синиша Ковачевич, Деян Санкович, Саша Фаржанґ, Александар Кочиш и Роберт Тома, а предводзел их предсидатель Совиту Месней заєднїци Владимир Олеяр.
Одход на змаганє до Перечину финансовали керестурски привреднїки, котри були и у екипи, а на тим госцованю з нїма бул и привреднїк Елемир Рац.