У варошу, у циню Акрополя тих дньох, як и звичайно – вре як у кошнїци, а хвиля пременлїва, з часу на час, та пада. Лєм у кратким шпациру од, наприклад, гайзибанскей станїци по даєдну з главних площох як цо Омония лєбо Монастираки, указує ше пестра слика Атини з карактеристичнима сценами живота гражданох: вецейпантлїково авениї и булевари з френетичним транспортом менєй прикажу тото цо приблїжени фокус по цесних улїчкох того типового балканского архитектонского гавзу може представиц – найнєвироятнєйши сцени зоз живота доселєнцох шицких фарбох скори (преважно) жемох трецого швета, интравенозних наркоманох по блазираних (билявих) туристох, цо ше мервя коло Партенона и другей Антики и Византиї. Домашнї реакционерни моци нє заоставаю у докладаню упечатку, од (гласних) синдикалних митинґох безроботней класи по анархистични кварти и їх препознатлїви печац з паролами, ґрафитами и муралами виписанима вше и вшадзи: „Берлин то нова Атина”. Упечаток же то горучка як пошлїдок мутираного духа гражданскей войни.
У такей зложеней социялней и политичней клими общого дружтвеного колапсу, чолни людзе пануюцей партиї Сириза ше намагаю запровадзиц диялоґ на шицких уровньох, та и на локалу по менших партийних єдинкох. Леґализация канабису за медицински наменки и можлївосц усвойованя дзецох истополним малженским заєднїцом були лєм два закони котри прешли у парламенту тих дньох док сом пребувал у пристолним варошу Греческей, а з їх инициятиву. Но, ситуация за державу у перманентним банкроту вельо компликованша на ширшим ґеополитичним плану. Гоч ме прешвечовали даєдни з активистох же кельо то проґресивна алтернатива наспрам конзервативнєйших опцийох типа опозицийней Неа (Новей) демократиї – знал сом же заключок будзем мушиц пренайсц даґдзе на нєпристраснєйшим месце. Греки то, тарґовци, знам их уж…
Праве як сом прешол гранїцу, на Дойранским озеру, єден натурализовани Македонєц з меном и презвиском Василь Нагирни (баяко же „и тот наш”!)., по походзеню з тутейших хотарох, при домашнєй палєночки и кафи ме прешвечел же Сириза то исте тото цо и їх актуални премиєр (Зоран) Заев, односно сербиянски защитнїк гражданох Саша Янкович – читай прозаходна, америцка манипулация. Но, алє после мачканя у озеру, мама Павлинка з котру зме аж и прегварели словечко два з „рідною мовою” виволала за сина Васкета, декларованого Путиновца, як праве гинто зґлайзал на роботи пре свойо политични пискалованя. Нє чудно за чловека котрому фамелийна ґенетика памета крижну драгу од Галичини, прейґ босанского Прнявора, кулянски хотари по тоту еґзотику на барз неуралґичней точки: сторочнїца балканских и першей шветовей войни ище вше скрива очиглядни, а боляци теми конфликту нашлїднїкох турецкей империї – Грекох, Болгарох, Македонцох, Албанцох, Сербох…
Як сом прешол гранїцу при Куманове, дакус ми заш лєм оддало: ту (у нас) голєм сом ше звикол и можем препознац же хто цо и же „хто наш”.